A Cañiza | O Alcalde Luis Piña, acompañado da Tenente de Alcalde Mª José Rodríguez, reuníuse o pasado 1 de marzo, no Salón de Plenos da Casa Consistorial, cos apicultores locais para facerlle entrega de 70 botes de líquido atraente que permitirán iniciar nesta primavera os traballos de neutralización dos niños.
Segundo explicaron nesta xuntanza os 70 botes entregados permitirán colocar na nosa contorna un total de 560 trampas. Cada bote contén 500 ml de produto para disolver en litro e medio de auga, resultando un total de 2 litros de líquido atraente que permitirán, á súa vez, crear 8 trampas.
Esta iniciativa reúne a máis de 40 apicultores profesionais e non profesionais da Cañiza que suman un censo de máis de 3.000 colmeas, todos dados de alta no rexistro apícola da Consellería de Medio Ambiente e ten como obxectivo capturar ás raíñas velutinas para evitar que aniñen e se poida reducir o impacto e a merma na nosa abella autóctona.
Como en anteriores ocasións os apicultores extenderán o produto máis alá das súas colmeas, abarcando máis terreo para que a campaña sexa máis eficiente.
Esta campaña dá continuidade á iniciativa do Goberno Local, de marzo de 2021, de axuda a esta rama produtiva do noso sector primario, que fabrica un mel moi valorado xa pola calidade da flora de media montaña do noso municipio.