Salvaterra de Miño | O sábado 31 de agosto terá lugar em Salvaterra de Minho a ediçom nº36 do histórico Festival da Poesia no Condado, um ano depois da comemoraçom dos 50 anos de vida da sua entidade promotora, a SCD do Condado. A solidariedade galega com a causa palestina será o eixo central das atividades previstas que, como é habitual, combinam poesia com música e diferentes expressons artísticas, culturais e desportivas, num encontro lúdico e reivindicativo que reunirá milhares de pessoas na vila raiana e capital histórica da comarca.
O programa de atividades terá o seu começo na manhá, às 10:30, cumha descida de embarcaçons tradicionais polo rio Minho e a saída do ‘trem Chu-chú’ que levará as pessoas assistentes polas ruas de Salvaterra e Monção a partir das 11 horas.
A potente trevoada percussionista de Ameaça de Bombo marcará o arranque festivo também às 11 no torreiro da festa, a Praça da Oliva no recinto amuralhado de Salvaterra, marcando aliás a apertura dos postos do mercado de atesanato e coletivos que envolverám ao longo do dia todo os espaços centrais da festa.
Poesia, música e cinema por Palestina
Nesta ocasiom quixemos identificar a luita da Palestina com a luita das mulheres, razom pola qual o elenco de poetas é exclusivamente feminino. Em diferentes espaços e de maneira intercalada entre as atividades da jornada, recitarám os seus poemas a investigadora e poeta palestina Shahd Wadi, junto a Arancha Nogueira, Inma Núñez Núñez, Diana Kurich, Iris Abril Teijeira, Afra Torrado, Lucía Cernadas, Susana Araujo, Susana Arins e Charo Lopes.
No apartado musical, ao meio dia teremos connosco às festeiras Brassica Rapa junto a umha nova aposta rapeira do Condado, Escola da Rata. Pola tarde, dança palestiniana com Jafra Group, justo antes da intervençom de Pallasos en Rebeldía com o seu Check Point Clown. Os Carunchos servirám de aperitivo à apertura do cenário principal, que acolherá o virtuosismo de Xabier Díaz e Adufeiras de Salitre, o novo projeto de Jásper (ex-Nao) Loita Amada, os míticos italianos Banda Bassotti, que já estiveram no Festival em 2006, e a emblemática banda viguesa Skárnio, acompanhados nos descansos polo pica-discos Marqués de Vilapodre DJ Set.
Activistas da causa na Mesa das Ideias
A Praça do Peixe de Salvaterra, a escassos metros do torreiro, será o espaço onde terá lugar a Mesa das Ideias, que contará com a presença da investigadora palestiniana residente em Portugal Shahd Wadi, o clown ativista Iván Prado, a eurodeputada Ana Miranda e o militante da Frente Popular para a Libertaçom de Palestina (FPLP) Fayez Badawi. Moderada pola ativista galega Charo Lopes, terá como título “Palestina: ocupaçom, resistência e solidadiedade”. As ponentes analisarám a situaçom actual e abrirá-se um debate para permitir a intervençom do público assistente neste fórum.
Na própria Praça do Peixe terá lugar também a apresentaçom do livro “Cantos de dor e liberdade. Voces galegas por Palestina”, que reúne 42 poemas e 12 ilustraçons de artistas galegas solidárias com a causa, impulsado polas entidades Galiza por Palestina, Mar de Lumes, Jenin e Pallasos en Rebeldía, com a colaboraçom de BDS-Galiza e editado por Tempo Galiza.
Aliás, serám apresentados os livros “No pasarán!” e “A guerra a Leste. 8 meses no Donbass” com a presença dos seus autores, David Cacchione e Bruno Carvalho. Como também a novela gráfica Balada do Desterro, que aborda a relaçom do Zeca Afonso com a Galiza, através de textos de Teresa Moure e ilustraçons de Maria João Worm.
Leila Khaled agradece a solidariedade galega
A histórica militante da FPLP e referente internacional da luita palestiniana Leila Khaled fixo chegar à SCD Condado umha emotiva comunicaçom que será publicada na apertura da antologia poética editada para este Festival da Poesia, umha “saudaçom do heroico povo palestiniano e da sua resistência. Umha saudaçom internacionalista da Frente Popular para a Libertaçom da Palestina ao povo solidário galego”.
Pondo o foco em que “Sabemos que este genocídio executado polo imperialismo, o sionismo, o chamado Estado de Israel e as forças reacionárias árabes, fracassará, porque nunca poderám destruir o nosso espírito de luita. Nunca deixaremos de luitar até conseguirmos umha Palestina livre, independente e soberana do Rio Jordám ao Mediterráneo, com capital em Jerusalém”, e concluindo que “Como dixo a poeta, «a solidariedade é a ternura dos povos», e hoje, à beira do Minho, no Festival da Poesia do Condado, escrevedes um novo poema de amor e apoio à nossa causa. Obrigada!”.
Cadeia humana pró-Palestina na ponte internacional
Para as 16 horas está convocada umha mobilizaçom na ponte internacional Salvaterra-Monção, onde será despregada umha cadeia humana solidária com Palestina que unirá as duas margens do Minho com o objetivo de visibilizar o nosso apoio à sua causa, na que havemos contar com presença galega, portuguesa e internacional.
Bilharda, chave, futebol gaélico e festa infantil
No ámbito desportivo, a novidade deste ano consistirá num Aberto de Chave que terá lugar às 12:30 no Parque da Canuda. Integrará explicaçons sobre o desenvolvimento do jogo cum campeonato popular aberto à participaçom de todos e todas. Antes deste, no torreiro da festa, terá lugar o já tradicional Aberto de Bilharda e, pola tarde, no Campo do Casal, a sexta ediçom do jogo aberto de Futebol Gaélico Festival da Poesia. Também haverá umha atividade dirigida expressamente para as crianças, a festa infantil que terá lugar às 19:00 na Porta da Oliva com a representaçom de A Historia de Blancaflor do contacontos Fran Rei.
