Vigo | A Academia de ViaGalicia, a aceleradora da Zona Franca e Igape, botou a andar este venres no Centro de Negocios de Porto do Molle cos 23 proxectos seleccionados do Startup Day que, durante o próximas sete semanas, afrontarán esta fase de preaceleración para a súa validación e definición.
Esta nova etapa do programa desembocará nun Demoday para a elección dos 15 finalistas que participarán na 8ª edición da aceleradora. As TIC, o sector agroalimentario e pesqueiro e o sector turístico son os predominantes entre os 23 proxectos que traballarán na Academia. Tamén hai propostas relacionadas co aeroespacial, as enerxías renovables, a saúde, a medicina ou a cultura.
Das 23 iniciativas 15 son de equipos da provincia de Pontevedra, 5 delas de Vigo, ademais das 3 da provincia da Coruña, 2 da de Lugo e outras 2 da de Ourense. O obxectivo da Academia de ViaGalicia será facilitar ás propostas participantes os coñecementos, competencias e habilidades necesarias para definir o seu modelo de negocio a través dun programa práctico de pre-aceleración, enfocado á proposta de valor e a súa orientación ao mercado.
Nesta fase coñecerase mellor aos emprendedores, as súas propostas e analizarase o seu grao de desenvolvemento; o certo é que a pre-aceleración, converteuse tamén, nas sete edicións previas, nun importante activo para os proxectos, xa que non só axuda aos promotores para mellorar a definición do modelo de negocio, senón que lles axuda a entender o seu proxecto desde a perspectiva dunha empresa.
O programa está integrado por sesións formativas prácticas que se desenvolven en venres e sábado durante 7 semanas. Tamén se impartirán titorías individuais a cada proxecto e participarán nun total de 6 mesas redondas con outros emprendedores de referencia. As temáticas que se abordarán son: a importancia do equipo dunha Startup; a comunicación, propostas de valor e modelos de negocio; desenvolvemento dun produto mínimo viable (MVP); orientación ao mercado (en liña e offline); captación de clientes; desenvolvemento de proxeccións económico-financeiras; aspectos xurídicos e legais relacionados coa constitución e inicio da sociedade; elaboración dos pactos de socios e a negociación e defensa do modelo de negocio.
Trátase, en esencia, de que os equipos consigan dispoñer, ao final desta fase, dunha primeira proposta do seu modelo de negocio e teñan a capacidade de presentala de forma solvente ante o Comité Técnico do Programa. Unha vez finalizada a Academia, os emprendedores participarán nun Demo Day de onde sairán un máximo de 15 propostas que se incorporarán en setembro á 8ª edición da aceleradora ViaGalicia, que contou cunha participación inicial de 108 iniciativas.