Ourense | Como xa é habitual desde fai varias edicións, Termatalia conclúe a súa edición en Ourense entregando a testemuña ao país que a acollerá o ano que vén xa que, desde 2012, a feira alterna cada ano a súa sede entre Ourense e América. A edición de 2025, a sexta da feira no continente americano, celebrarase en Colombia.
O alcalde de Paipa, Germán Camacho; o secretario de turismo do Goberno de Boyacá, Eduin Contreras; o representante de Procolombia, Pascual Martínez; a directora do Instituto Termal de Paipa, Martha Florez, e o delegado de Termatalia neste país, Ricardo Ramírez, foron os responsables de defender a postulación deste país para ser sede da que será a 23ª edición da Feira Internacional de Turismo Termal, Saúde e Benestar e que terá o obxectivo de posicionar a Paipa como o destino termal máis importante de Colombia.
A cesión da testemuña a Colombia tivo lugar durante o acto oficial de clausura de Termatalia 2024 que serviu tamén para celebrar o Día Mundial de Turismo. O director da feira, Rogelio Martínez, indicou que “turismo é moito máis que un motor económico; é un potentísimo instrumento para favorecer o entendemento entre nacións, o intercambio cultural e a paz. En Termatalia sumámoslle ademais a saúde e o benestar. E todo o bo que trae consigo o turismo escenificámolo aquí entregando a Colombia as chaves de Termatalia 2025”.
Este acto de clausura estivo presidido polo presidente do Parlamento de Galicia, Miguel Santalices, que estivo acompañado polo director da Axencia de Turismo de Galicia, Xosé Manuel Merelles Remy; polo delegado territorial da Xunta de Galicia en Ourense e presidente do comité executivo de Expourense, Manuel Pardo; polo xefe da área de Benestar da Deputación de Ourense, José Juan Cerdeira, e polo vicerreitor do Campus Auga-Universidade de Vigo, Francisco Javier Rodríguez Rajo.
O presidente do parlamento reivindicou a necesidade de incluír o termalismo terapéutico prescrito por un médico na carteira de servizos do Sistema Nacional de Saúde español indicando que “o reivindico sempre que teño ocasión e seguireino facendo ata o meu último alento político ou ata que sexa unha realidade”.
Tamén interveu neste acto o director da Axencia de Turismo de Galicia, Xosé Manuel Merelles, quen destacou que os últimos investimentos en infraestruturas termais e en rehabilitacións das vilas termais permiten pensar en “un futuro esperanzador para o termalismo en Galicia, o gran destino termal de España”.
O premio á Responsabilidade Social Corporativa e Sustentabilidade recaeu nesta ocasión non sobre unha marca, se non sobre unha empresa que xestiona varias marcas de auga mineral (Cabreiroá, Fontarel Zero Sodio e Auga de Cuevas e Auara), Hijos de Rivera. O xurado valorou que esta empresa “ten o obxectivo de xerar un impacto positivo na contorna no que desenvolve a súa actividade, sendo conscientes de que non só é importante o que fan, senón tamén a forma en que o fan”.
Culmina así a ata o de agora edición máis profesional de Termatalia na que se puxo o foco no negocio, cunha bolsa de contratación na que participaron 28 operadores de turismo líderes do mercado nos seus países de orixe, e coa celebración do V Congreso Internacional sobre Auga e Saúde que reuniu a 30 expertos e convocou a 500 asistentes entre presenciais e en liña. Termatalia 2024 pecha as súas portas despois de convocar a 100 expositores e recibir máis de 4.000 visitas de profesionais.
