Con vistas á celebración da XXXII Festa do Requeixo e do Mel os días 18 e 19 de abril, o Alcalde José Manuel Alfonso (PPdeG) repasa a actualidade municipal.
Dende que es Alcalde, cales son os feitos máis destacados e os proxectos de futuro?
Entre os feitos máis destacados está a unión entre a veciñanza, sexa da cor política que sexa, algo que antes non existía porque era máis exclusivo, quizáis de esquerdas. Entre os proxectos está a accesibilidade aos núcleos de poboación, que estaba moi deteriorado e non había unha política a seguir. Estamos incidindo no acceso aos barrios e parroquias máis illados. Tamén está o tema da seguridade na PO-400, na que estamos traballando coa Xunta, tal e como confirmouse coa recente visita da conselleira María Martínez Allegue. O enlace dende Setados está en fase de expropiación.
Tamén coa Deputación estamos traballando na accesibilidade para a Escola de Música de Rubiós e completar a estrada dende Setados ata San Xosé de Ribarteme e San Cibrán Vide. Os desbroces e as franxas de protección tamén son prioridades: mandamos 4.600 cartas aos vecinos para limpeza de montes e estamos observando resultados positivos.
Entre outros proxectos están o deporte con pistas de pádel cuberta, ximnasio, sala de fitness e accesibilidade ás piscinas; a construción dunha gran Depuradora no río Xuliana, un proxecto de máis de 1M€. Temos outros proxectos en marcha como a construción da Residencia de Maiores no antigo edificio do cuartel da Garda Civil pero algúns deles están bloqueados por demandas da oposición, un factor que condiciona a adquisición destes activos.
Qué proxectos impulsa nas Neves o GDR Condado Paradanta?
Estamos traballando nunha senda enogastronómica que imos dividir en dúas de patrimonio, unha no Val de Termes e outra no Val de Xuliana, para dar visibilidade á contorna arquitectónica e paisaxística e outra para unir o complexo das Furnas, os Muíños da Xuliana, o castro de Altamira e os petroglifos de A Coutada.
“Estamos traballando coa GDR Condado Paradanta nunha senda enogastronómica”
Cómo afecta a PLISAN?
Sen urbanizar porque a Xunta decidiu urbanizar primeiro en Salvaterra. Nas Neves houbo tamén algún problema de demandas veciñais e das Asociacións de Montes.
Recentemente renunciaron a súas actas o ex alcalde Xosé Manuel Rodríguez e a concelleira Pilar González (BNG). A que cres que obedecen estas dimisións?
Non podo falar con coñecemento de causa; supoño que serán temas internos. Pero gostaríame destacar que no noso partido tamén fixemos unha renovación importante, entrando xente moi nova.
