Ourense | Unha multa de 600 euros e 230 máis en concepto de responsabilidade civil polos danos causados en xuño de 2023 a unha lona publicitaria coa mensaxe “Bienvenido a Ourense, cidade que en galego chámase Ourense”, é a pena que solicitou o letrado que representou a “Falemos español” contra os dous mozos acusados de vandalizarla, Lucas Xabier V. e Irene L., por un delito leve de danos.
A representante do Ministerio Público exonéraos ao entender que non son danos senón en todo caso coaccións (delito de ámbito privado) mentres que o avogado Xoán Antón Pérez Lema solicitou á xuíza de Instrución 2 a súa absolución pola inexistencia de proba de cargo.
A acusación que exerce a asociación que preside Gloria Lago susténtase nun vídeo dunha gasolineira próxima da avenida de Santiago no que se ve un coche e baixar a dous mozos que, segundo a Policía Nacional, eran os acusados, aínda que ningún axente foi chamado á vista oral para confirmar ou desmentir.
Para Pérez Lema, avogado dos acusados, a denuncia ten “finalidade ideolóxica” e a parte denunciante esgrimiu un motivo similar á hora de buscar un porqué á acción vandálica. Segundo o letrado da acusación, Lucas presentouse nas listas do BNG no Concello do Saviñao. O acusado aclarou que foi como independente no Concello de Pantón.
Lucas foi o único que asistiu ao xuízo porque Irene estaba de exames e o tipo de pena non obriga á asistencia á vista oral. O mozo acolleuse ao dereito a non responder as preguntas das partes, pero aproveitou o dereito á última palabra para aclarar que se chama “Xabier non Javier”, que non concorreu nas listas do BNG e que é membro da Mesa desde 2018 e Irene desde 2024.
O presidente da Mesa, Marcos Maceira, asegurou que este tipo de campañas con topónimos deturpados son un ataque á dignidade colectiva de Galicia que tamén cometen, mesmo, organismos públicos.
Na foto, membros da Mesa Pola Normalización Lingüística concentrados diante do edificio xudicial do Couto en apoio dos imputados.