Mondariz | En vésperas das festas terán lugar varios festivais de Nadal organizados polo coro local Agarimos da Terra, a Escola Municipal de Música de Mondariz e a asociación CEAR Castromao, así como un espectáculo de teatro que visibiliza o talento local e unha proxección cinematográfica que pon en valor as traídas de auga veciñais
Este mes de decembro, as festas de Nadal protagonizan a programación de actividades socioculturais do Concello de Mondariz. Ademais das visitas do Apalpador (21 de decembro) e dos Reis Magos (5 de xaneiro), proxectaranse tres filmes de cinema familiar no auditorio municipal, con entrada libre e gratuíta até completar a cabida: “El extraordinario viaje de T. S Spivet” (23 de decembro), “Querido Evan Hansen” (30 de decembro) e “Clifford, el gran perro rojo” (3 de xaneiro).
Con todo, en vésperas das festas terán lugar varios festivais de Nadal organizados polo coro local Agarimos da Terra (11 de decembro), a Escola Municipal de Música de Mondariz (16 de decembro) e a asociación folclórica CEAR Castromao (18 de decembro). “O Concello de Mondariz promove e apoia estas iniciativas, e agradece o compromiso dos veciños e das veciñas para dinamizar socioculturalmente a localidade”, sinala o alcalde, Xosé Emilio Barros, en referencia ao esforzo veciñal para decorar o centro urbano con elementos naturais e artesanais que complementan a iluminación típica destas datas.
Teatro e artesanía na Praza de Abastos
Este sábado 10 de decembro, ás 21:00 horas, a Praza de Abastos de Mondariz será escenario dun monólogo protagonizado por Sara Guerrero Alfaro, veciña da parroquia de Sabaxáns e coordinadora dos obradoiros de teatro comunitario que se realizaron nas parroquias de Mouriscados, Gargamala, Sabaxáns e Toutón nos anos 2021 e 2022, financiados polo Concello de Mondariz. “Raigame” é un monólogo inspirado na experiencia migratoria da propia autora, de orixe mexicano, que foi seleccionado no certame Metro Catrado do FIOT de Carballo 2021, onde recibiu o premio á mellor interpretación, e representado en diferentes escenarios da xeografía galega.
Os domingos 11 e 18 de decembro tamén está previsto que continúe neste espazo, durante a feira dominical de Mondariz, o mercado artesán de Nadal. Esta é a segunda edición desta actividade, organizada por un grupo de artesáns e artesás locais e apoiada desde o Concello de Mondariz. Participan no mercado postos de artesanía en coiro, prata, cerámica, resina, textil, gancho e cosmética natural, entre outros.
Documental sobre as traídas de augas veciñais
O 17 de decembro, o auditorio municipal de Mondariz acollerá a partir das 20:00 horas a proxección do documental “A auga que trouxeron”, producido pola cooperativa galega Trespés Filmes. Este filme, dirixido por Beatriz Vázquez Campaña, está centrado na realidade das traídas veciñais de auga: a historia, os conflitos actuais e o seu futuro. A entrada será libre e gratuíta até completar a cabida.
Estratexia de desenvolvemento económico e turístico
Desde a Alcaldía aprobouse inicialmente o Plan Especial de Infraestruturas e Dotacións (PEID) para a construción dun albergue turístico na parcela da Cela, un espazo que fora acondicionado en 2020 grazas a un obradoiro dual de emprego
A este avance estratéxico para o desenvolvemento turístico da localidade súmase a confirmación de 144.545 m² de solo industrial na Lagoa, convenientemente situada en relación ao centro urbano e ás vías de comunicación
O Concello de Mondariz rematará este ano 2022 con significativos avances na estratexia municipal para sentar as bases do futuro desenvolvemento económico e turístico da localidade, sen depender dos longos e custosos trámites que requeriría a reactivación do Plan Xeral de Ordenación Municipal (PXOM), iniciado en 2005 e frustrado unha década despois ao crebar a empresa adxudicataria (Consultora Galega S.L.).
“Durante este mandato tivemos consultas coa Xunta de Galicia para considerar a reactivación do PXOM, pero a Consellería de Medio Ambiente, Territorio e Vivenda non manifestou apoio para financiar o proxecto, que na situación actual debería iniciar o proceso desde cero. O PXOM é un obxectivo a longo prazo que deberá financiarse con recursos municipais.
Neste contexto, buscamos fórmulas máis rápidas e resolutivas para crear solo industrial na Lagoa e construír un albergue turístico na Cela. Estes dous proxectos forman parte da mesma estratexia de desenvolvemento económico”, sinala o alcalde de Mondariz.
Albergue turístico na parcela municipal da Cela
O alcalde, Xosé Emilio Barros, axilizou a aprobación inicial do Plan Especial de Infraestruturas e Dotacións (PEID) para a construción dun albergue turístico e un aparcadoiro de autocaravanas na parcela municipal da Cela mediante unha Resolución de Alcaldía por indicación dos propios servizos xurídicos municipais, que non vían necesario levar este trámite a sesión plenaria.
Entre os anos 2020 e 2021, en previsión deste desenvolvemento, a parcela municipal da Cela foi espazo de prácticas do obradoiro dual de emprego “Medrando entre todos e todas”, dentro da especialización en traballos forestais e de xardinería.
“Antes desta actuación, esta parcela municipal situada entre o río Tea e o centro urbano de Mondariz era un cascalleiro cheo de pedras e lixo. O potencial é enorme, e Mondariz, malia ter a vantaxe dun nome que chama ao turismo, carece de infraestruturas para albergar visitantes”, sinala o alcalde.
A través desta fórmula, precisamente, o Goberno municipal de Mondariz está sentando as bases xurídicas necesarias para dispoñer de solo habilitado para construír un albergue turístico, unha iniciativa innovadora con clara visión de futuro para un concello con enormes potencialidades para o turismo rural e de natureza.
Solo industrial na área da Lagoa
A idea inicial do Goberno municipal para crear solo empresarial en Mondariz tamén pasaba por un Plan Especial de Infraestruturas e Dotacións (PEID), pero finalmente viuse unha oportunidade no proceso de revisión que estaba experimentando o Plan de Ordenación de Áreas Empresariais de Galicia e solicitouse a inclusión dunha nova área de solo industrial na Lagoa, que foi admitida pola Xunta de Galicia en xullo deste ano. Na modificación do seu Plan Sectorial de Ordenación de Áreas Empresariais, a propia Xunta de Galicia prescindiu da área prevista con anterioridade en Chan de Cairón, entre Mondariz e Fornelos de Montes, maioritariamente localizada na parroquia de Gargamala e cun impacto sobre o patrimonio moito maior.
Esta área de solo industrial na Lagoa, de 144.545 m² e que acollerá un futuro parque empresarial que tamén poderá dar servizo ao veciño concello de Mondariz-Balneario, está actualmente en fase de aprobación inicial. A finais de novembro rematou o período de alegacións aos plans de construción de parques empresariais. “Descoñecemos se se presentaron alegacións en relación a esta área empresarial de Mondariz. En todo caso, teremos que agardar a que a Xunta de Galicia resolva todas as alegacións presentadas. Levará o seu tempo, pero a inclusión de solo industrial no Plan Sectorial de Ordenación de Áreas Empresariais de Galicia é un gran avance para Mondariz”, destaca o alcalde, Xosé Emilio Barros.
Antes de chegar á Alcaldía, Xosé Emilio Barros xa se comprometera a impulsar o desenvolvemento dun parque empresarial no Concello de Mondariz. “Desde o Goberno municipal decidimos apostar por fórmulas eficaces para dar resposta a cuestións estruturais que non se poden demorar máis. A necesidade de solo industrial é unha delas. Con vontade resolutiva, aproveitamos que o Plan Sectorial de Ordenación de Áreas Empresariais de Galicia estaba en proceso de revisión para axilizar o proceso e poder optar a liñas de financiamento para o futuro desenvolvemento do parque empresarial”, explica.
