Ponteareas | As e os primeiros residentes da residencia de artistas Artistea xa están en Ponteareas. Ao longo desta semana traballarán en proxectos multidisciplinares arredor da poesía, da música e da performance.
A alcaldesa de Ponteareas, Nava Castro, e o delegado da Xunta de Galicia en Pontevedra, Agustín Reguera, achegáronse para darlles a benvida acompañados dos concelleiros de Ensino, Ricardo González, e do segundo tenente de alcaldesa, Jesús Cao. Na residencia, a directora Laura Porto, presentoulles os proxectos e o perfil de cada un dos residentes.
Esta é a primeira das residencias que se programarán de xeito trimestral subvencionada ao 100% polo Concello e que dará oportunidades a novos talentos. “Esta primeira residencia posibilita o encontro de distintas disciplinas e de creadores de idades diferentes que coñecerán a orixe e sinais de identidade máis salientables de Ponteareas. A residencia de artistas abre as portas de Ponteareas a creadores de todo o mundo que queiran ter un espazo no que crear e servirá como axente dinamizador da Praza Maior”, explicou a alcaldesa Nava Castro.
Ponteareas volve ser un referente no eido cultural, así o salientou o delegado do goberno da Xunta en Pontevedra, “tal e como trasladamos na inauguración dende a administración daremos apoio a iniciativas culturais como esta que son unha plataforma de lanzamento e devolven as vilas parte da súa esencia, servindo incluso como elementos atractores de turismo e dándoas a coñecer a través da arte”.
Coletivo RAIZ 11 formado por Giovanni Peixoto e Francisco de Vicente traballarán o seu proxecto “Entroñados”; colectivo Nubeilab desenvolverán “Ecos” con José Pons, María Gutiérrez e Andrea Trenado; Carmen Omil presenta “Sistema del Deseo”; Alex Bouzó “O Musgo que Medra”; Antonio Tizón “Coplas Analfabetas” e Aurora Abelairas realizará a cartografía poética do Condado mentres Diego Chamizo centrará a súa labor no proxecto “Reflexo Natural”.
Ao longo desta semana traballarán na nosa vila e visitarán o Castro de Troña, o museo de Ponteareas, empresas locais e manterán encontros con agrupacións folclóricas e distintos colectivos dentro das súas tarefas de investigación e documentación.
Ademais, o xoves recibirán a masterclass da artista multidisciplinar Lucía Aldao, tendo a cidadanía a oportunidade de participar de 12:00 a 14:00 horas con inscrición previa no número de teléfono 986 64 00 00.
Programa Xuventude Mentoring na Empresa
A alcaldesa de Ponteareas, Nava Castro, acompañada do concelleiro de Xuventude, Cristian Montes, recibiu hoxe ao alumnado do Programa Xuventude Mentoring na Empresa. Este programa da Consellería de Cultura, Lingua e Xuventude busca favorecer a formación práctica e o contacto co tecido empresarial por parte da mocidade impulsando as oportunidades de emprego xuvenil. No acto de benvida tamén estaban as e os representantes das empresas nas que esta mocidade dará os seus primeiros pasos laborais.
Dez mozas e mozos reciben formación práctica en dez empresas do tecido local e tamén no propio Concello. Durante as estadías recibirán unha bolsa de formación dun mínimo de 661,50 euros ao mes e terán unha persoa titora encargada do seu seguimento.
“Agradecemos o apoio da Xunta de Galicia neste novo impulso por facilitar o acceso ao mercado laboral destas dez mozas e mozas. Esta acción súmase ao primeiro plan de emprego xuvenil que xa está en marcha e que forma a vinte xoves. Queremos axudar á xuventude a superar a barreira do primeiro emprego e, á vez, amosar ao tecido empresarial e comercial o talento das nosas persoas mozas”, explica a alcaldesa.
A maiores destas estadías, tamén contarán cun plan formativo complementario en habilidades e competencias para o emprego, cun mínimo de 20 horas lectivas, que se poderán impartir en modalidade presencial, teleformación ou mixta.
As persoas beneficiarias só tiñan que ter feitos os 18 anos e non superar a idade máxima que estableza a normativa vixente do SNGX (30 anos), ademais de estar empadroadas na Comunidade Autónoma de Galicia cunha antigüidade mínima dun ano e estar inscritas no SNGX e figurar como beneficiarias no ámbito da Comunidade Autónoma de Galicia.
