Tui | O recén inaugurado espazo sociocultural da rúa Camilo José Cela acolleu a presentación da programación das Festas de San Telmo 2025 que, como indicou a concelleira de Cultura, Sonsoles Vicente, busca durante dez días do 19 ao 28 de abril “dar a coñecer a riqueza de Tui” a través dunha “explosión cultural” e unha ampla oferta de actividades gastronómicas, enolóxicas, musicais, teatrais e deportivas, entre outras.
Vicente salientou a pretensión de “por en valor o noso, a nosa tradición” destacando que por primeira vez actuarán as catro bandas de gaitas de Tui. Toda vez recalcou o interese dos grupos locais por participar nesta programación: “recibimos ata 20 solicitudes de grupos”, indicou Vicente. A programación realizarase nos principais recintos públicos do municipio destacando o Espazo Feiral, o Teatro Municipal, o Paseo da Corredoira, o Espazo sociocultural da rúa Camilo José Cela e a Igrexa de San Telmo. A concelleira de Comercio e Turismo, Ana Núñez, considerou que estas festas serán un “revulsivo económico” para o comercio local. O concelleiro de Deportes, Rafael Estévez, informou que a tradicional Carreira Popular de San Telmo a celebrarse o sábado 26 de abril levará este ano o nome “Memorial Tato”, en honor ao concelleiro Xosé Martínez Tato, falecido en xaneiro pasado. Finalmente, o Alcalde Enrique Cabaleiro destacou a implicación do Concello na organización destas festas.
A programación da conta dunha prolífica actividade na que destacan o IV Encontro de Viños da Raia, o Encontro Bandas de Gaitas, os tradicionais Xigantes e Cabezudos, exposicións, teatro infantil, circo, foliadas, pasarrúas, charangas, danza, bandas de música, a Feira Cabalar, os concertos de Herdeiros da Crus, Good God!, Wondercovers, Claxxon, Kubo e djs, as orquestras Olympus e Los Players, a Coral de San Telmo, a XV Semana de Teatro Amador e a V Gala “Premios Cidade de Tui”. Durante a presentación tamén informouse da celebración da Feira do Meixón entre o 11 e 28 de abril como “símbolo da tradición culinaria do río Miño”.
O acto finalizou cunha interpretación musical a cargo de G FACE, talento tudense que estreará a súa produción cunha actuación o sábado 19 de abril no Espazo Feiral.
