Salvaterra de Miño | O CEIP Plurilingüe de Leirado en Salvaterra de Miño vén de ser galardoado no IX Concurso de Traballos por Proxectos que foi convocado pola Dirección Xeral de Ordenación e Innovación Educativa no contexto do Plan LIA de Bibliotecas Escolares da Consellería de Cultura, Educación, Formación Profesional e Universidades.
O proxecto premiado foi “Mergúllate con nós: Descubre e aprende”, na modalidade de proxectos documentais integrados, coordinados dende a biblioteca escolar. Entre os criterios tidos en conta para a valoración do proxecto figura a participación de toda a comunidade educativa no seu desenvolvemento.
Este premio supón, unha vez máis, o recoñecemento de que o deseño deste proxecto e os que se están a desenvolver no centro coloca ao seu alumnado no camiño axeitado para acadar a mellor competencia lectora e para acadar competencias que son clave na sociedade da información, nomeadamente a súa competencia para o uso e produción de información.
Parabéns, polo tanto, para o equipo da biblioteca, equipo docente, persoal non docente, alumnado, familias, ANPA e outras institucións que participaron no desenvolvemento do proxecto no pasado curso escolar (CFR de Vigo, Asesoría de Bibliotecas Escolares de Galicia, Inspección Educativa, Concello de Salvaterra de Miño,…)
Dende o centro esperamos contar coa colaboración novamente de toda a comunidade educativa para o desenvolvemento de proxectos vindeiros.
Aberto o prazo de inscrición para o Enterro da Lamprea
O Concello de Salvaterra de Miño anuncia que dende este luns 15 de xaneiro e ata o 31 de xaneiro todos aqueles que queiran participar como comparsa ou carroza no Enterro da Lamprea 2024 que se celebra o 17 de febreiro, deberán inscribirse no Concello de Salvaterra de Miño, a través de Sede Electrónica as Asociacións e de Rexistro ou sede electrónica as agrupacións.
Neste desfile poderán inscribirse todas aquelas Comparsas e Carrozas, que cumpran os requisitos. Só se poderá inscribir unha comparsa ou carroza por asociación ou persoa.
As modalidades son categoría de Carroza aquelas carrozas que teñan como mínimo 25 participantes e unhas dimensións mínimas de 5 m de largo e categoría de Comparsa as que teñan un mínimo de 20 membros.
As comparsas ou carrozas deberán gardar unha unidade temática tanto no seu vestiario coma na súa actuación. Non se considerarán como comparsas ou carrozas con dereito a inscrición e participación aquelas que en anos anteriores repetiran, no sustancial, o seu disfrace. Os premios a participación oscilarán entre os 100 e os 600 euros, dependendo da categoría e da cantidade de participantes.
Dende o Concello queren recordar que todas aquelas persoas que queiran participar no enterro de forma persoal e non a través dunha carroza ou comparsa poden facelo dentro da propia comitiva da defunta lamprea, formando parte do grupo de Choronas que acompañan a lamprea, de loito riguroso. Un ano máis, o desfile que percorrerá as principais rúas de Salvaterra de Miño sairá ás 17:00 horas dende a rúa Rosalía de Castro para rematar na Praza do Concello. As bases e información relacionada pode consultarse xa na web do Concello.
