Ourense | Un total de 43 peregrinos e peregrinas iniciaron esta mañá o seu particular Xacobeo, que os levará polo Camiño Mozárabe-Vía da Prata durante cinco domingos ata conseguir finalmente a súa “Compostela” o vindeiro 13 de outubro.
Esta iniciativa, promovida pola Deputación a través do Inorde, xa se iniciou en Semana Santa, continuou no mes de maio e xuño e establecerase de xeito periódico: “Estamos ante unha acción que xa consolidamos este ano con tres edicións, pois está prantexada, por indicación do presidente provincial, Luís Menor, para potenciar o noso Camiño e facilitar á xente que poida peregrinar pola Vía da Prata dun xeito cómodo e atractivo”, dixo Rosendo Fernández.
O deputado de Representación Institucional e presidente do Inorde asistiu hoxe a saída desta primeira etapa que ten o seu remate en Cea (con visita a Oseira incluída) logo de 22 quilómetros. Ao remate da mesma, un autobús devolverá aos peregrinos a Ourense. Do mesmo xeito, os vindeiros domingos, o autobús recollerá aos participantes en Ourense, levaraos ao inicio das correspondentes etapas, e ao finalizar, fará o recorrido de volta á cidade. Ademais, un guía explicará aos peregrinos os monumentos e lugares de interese polos que descorrerán as etapas.
O vindeiro domingo, 22 de setembro, será o traxecto Cea-Dozón- Puxallos, un percorrido de aproximadamente 22 qms. A terceira etapa será o 29 de setembro e levará aos peregrinos desde Puxallos a Silleda (22 qms); no cuarto domingo, 6 de outubro, terá lugar a cuarta etapa que vai de Silleda a Vedra-Susana, sendo un percorrido de 23 ou de 30 qms.
E, por último, o 15 de outubro peregrinarán a quinta etapa de Susana a Santiago de Compostela, o tramo máis curto, de 10 qms. aproximadamente.
Abertas as inscricións
Ademais, contarán ao longo desta experiencia cun autobús de apoio a media etapa e cun guía especializado que lles axudará a descubrir o patrimonio cultural e natural da provincia a través da Vía da Prata. Os interesados en realizar o Camiño poden inscribirse a través da páxina web www.conocegalicia.es por un prezo de 49 euros. Como novidade tamén se pode realizar a inscripción por etapas, por un prezo de 15 euros por etapa. En todo caso, as inscripcións están abertas para que a xente poida organizarse e anotarse con tempo segundo a súa dispoñibilidade. Na foto, saída hoxe desde a Ponte Romana de Ourense.
