Tui | O Concello de Tui celebrou esta mañá unha mesa de traballo coa asociación Diversidades Acolle na que abordou a continuidade da colaboración con esta entidade que dende hai ano e medio conta cun Centro de Acollida de Refuxiados na cidade.
O alcalde de Tui, Enrique Cabaleiro, o concelleiro de Servizos Sociais, Ismael Diz, e a traballadora social, Carmen González, reuníronse con Santiago Álvarez Avión, director, Inma Rodríguez Lago, responsable do centro de acollida de Tui, e con Belén Arranz Núñez, coordinadora de programas.
Dende o Concello de Tui amosouse a boa disposición para continuar coa colaboración establecida, en distintos ámbitos, con Acolle dende a súa implantación en Tui, estudando a posibilidade de estender esa cooperación entre ambas entidades a outros programas que realizan dende a entidade social.
No Centro de Acollida de Refuxiados que Diversidades Acolle ten en Tui viven 18 persoas pertencentes a unha familia siria que chegou en abril, dúas familias afganas e dous homes senegaleses que chegaron en agosto.
Tras o encontro desta mañá proximamente celebrarase outra mesa de traballo con outros departamentos municipais para seguir concretando as liñas de colaboración abordadas no día de hoxe.
Diversidades Acolle é unha asociación, membro de Red Acoge, que contribúe á defensa de dereitos e á inclusión das persoas migrantes e refuxiadas, promovendo a participación, a igualdade de oportunidades e a integración social e laboral.
