Salvaterra de Miño | AFAGA, a Asociación de familiares de enfermos de Alzheimer e outras demencias de Galicia, vai impartir na Casa do Conde do Concello de Salvaterra de Miño un curso para coidadores/as de persoas cunha demencia neurodexenerativa, no marco do proxecto de Coidados Compartidos de FAGAL (Federación Alzheimer Galicia).
Esta formación será impartida por unha psicóloga sanitaria especializada na temática, e ten como obxectivo formar e axudar a persoas en contornas rurais que se atopen nesta situación.
O envellecemento é o principal factor para a aparición dunha demencia e as proxeccións demográficas de Galicia prevén un aumento das persoas maiores de 65 anos do 23’15% actual ao 41% en 2050.
O contexto rural experimenta un fenómeno de sobre envellecemento ao que se lle engade unha escaseza de servizos e ausencia de intervencións. Esta realidade non só afecta á persoa que padece unha enfermidade senón a todo o núcleo familiar.
Por iso, o proxecto achega a familiares coidadores/as de persoas maiores con demencia, residentes no rural, formación e información sobre o alzhéimer e outras demencias neurodexenerativas, así como dos servizos e recursos segundo a localidade onde se intervén para mellorar a súa calidade de vida.
A formación que terá lugar o 8, 15 e 22 de marzo de 16:30 a 19:15 horas é gratuíta e pode realizarse a través do correo formacion@afaga.com ou no 986 229 797 ou 610 437 895.
