Pontevedra | Trala publicación das bases no Boletín Oficial da Provincia, as asociacións e entidades que xestionan escolas de música na provincia xa poden solicitar desde as achegas coas que a Deputación de Pontevedra apoia a difusión da cultura e o fomento da música desde estes centros.
A institución provincial destina un orzamento total de 90.000 euros a estas axudas, que se conceden por concorrencia competitiva, tendo en conta cuestións como o número de alumnos, o número de docentes, o orzamento de gastos da escola e as especialidades impartidas.
O prazo para que as entidades sociais soliciten estas achegas abre este martes 22 de agosto e pecha o próximo 29 de setembro. Con elas, os colectivos poderán financiar gastos de persoal, material de oficina, subministracións, a reparación e conservación dos seus locais, a reparación de instrumentos, as primas de seguros, servizos de asesoría ou xestoría, así como gastos de prevención de riscos ou recoñecemento médico.
Poderán solicitar estas axudas as entidades titulares das escolas de música dependentes de asociacións sen ánimo de lucro que teñan entre os seus obxectivos a formación musical, que estean inscritas no Rexistro de Escolas de Música e Danza da Comunidade Autónoma de Galicia, dependente da Consellería de Educación e Ordenación Universitaria, e que teñan o domicilio fiscal na provincia de Pontevedra. As peticións deberán presentaranse obrigatoriamente por vía electrónica a través do formulario dispoñible na sede electrónica da Deputación.
“Conectadas” na Lama, Soutomaior e Oia
Esta semana comezan tres novas accións formativas no marco do programa “Conectadas” da Deputación de Pontevedra nas que participarán 43 mulleres dos concellos da Lama, Soutomaior e Oia. Esta iniciativa ten como principal obxectivo potenciar a participación e a promoción das mulleres a través de accións formativas que este ano se desenvolverán en 53 concellos con máis de 4.000 usuarias.
O martes 22 de agosto iníciase un obradoiro de relaxación para 18 participantes da Asociación de Veciños San Bartolomé de Xesta da Lama. A actividade desenvolverase os martes no Casino de Xesta de 19 a 21 horas.
O mércores 23 de agosto dará comezo un curso de risoterapia, no que participarán 12 mulleres da Asociación de Veciños San Benito de Romariz, de Soutomaior. Asistirán a esta acción formativa na Casa dos Veciños de Romariz os mércores pola tarde, de 17 a 19 horas.
Por último, o xoves 24 de agosto comeza un curso de xardinería para 13 mulleres da Asociación de Mulleres Rurais de Oia na Casa da Sociedade de Burgueira. Impartirase os xoves, de 18:00 a 20:30 horas, en Oia, agás este mes de agosto, que se desenvolverá de 18:30 a 21:00 horas.
Neste 2023 participan no programa “Conectadas” 219 entidades de 53 concellos da provincia (Agolada, Arbo, Baiona, Barro, Bueu, Caldas de Reis, Cambados, Campo Lameiro, Cangas, Catoira, Cerdedo-Cotobade, Covelo, Crecente, Dozón, A Estrada, Fornelos de Montes, Gondomar, O Grove, A Guarda, A Illa de Arousa, Lalín, A Lama, Marín, Meaño, Meis, Moaña, Mondariz, Moraña, Mos, Nigrán, Oia, Pazos de Borbén, Poio, Ponte Caldelas, Ponteareas, Pontevedra, Portas, Redondela, Rodeiro, O Rosal, Salceda de Caselas, Salvaterra de Miño, Sanxenxo, Silleda, Soutomaior, Tomiño, Tui, Valga, Vigo, Vila de Cruces, Vilaboa, Vilagarcía de Arousa e Vilanova de Arousa).
Os colectivos beneficiarios puideron escoller entre 30 obradoiros ofertados dentro de cinco bloques temáticos: Emprende, iniciativas sostibles para o emprego; ExpresARTE; Conéctate; Sementa sostibilidade; e O teu momento, coidado e benestar. Todas as accións formativas, de 35 horas de duración, inclúen o tratamento da igualdade entre homes e mulleres de forma transversal nos seus contidos.
