En setembro quedará resolto o pago das peaxes lusas

A ministra de Fomento, Ana Pastor, informou hoxe de que no próximo mes de setembro estará resolto o sistema de pago nas autoestradas portuguesas para os viaxeiros españois.
Neste sentido manifestouse Pastor nunha reunión que mantivo co presidente do Eixe Atlántico e alcalde de Viana do Castelo, José María Costa, que estivo acompañado polo vicepresidente do organismo, o alcalde de Monforte de Lemos, Severino Rodríguez, e o secretario xeral, Xoan Mao.
A ministra explicou as conversacións que manteñen as patronais de ambos países e sinalou que, co aspecto técnico resolto, xa teñen “sobre a mesa” o protocolo de entendemento para a súa posta en funcionamento no prazo que sinalou.
Na reunión, tratouse, ademais, a mellora da operatividade da liña ferroviaria entre Vigo e Oporto, que é —dixo— “unha liña que ten moitísimas paradas e unha liña que necesita moitas melloras”.
Recordou que había un compromiso para a realización dun proxecto de alta velocidade, “que neste momento non se vai a realizar”, polo que considerou máis necesaria a mellora da rede convencional, para que se poidan ofrecer altas prestacións nesa comunicación entre España e Portugal.
Tamén resaltou que ambos países contan con fondos comunitarios que é preciso “reprogramar”, para non perdelos.
Apuntou así mesmo a intención de implantar un billete único, pois considerou que ter que adquirir dous para viaxar 100 quilómetros é “do século XIX” e dixo que “no tempo o máis curto posible” será unha realidade.
O proxecto, que cualificou de “moi ambicioso”, inclúe a mellora das vías, a catenaria e a electrificación, para o que anunciou novas reunións con representantes do Goberno portugués, co que resaltou que existe unha “gran sintonía”, co obxectivo de que “non pase un só mes sen que avancemos nalgún aspecto.
O presidente do Eixe Atlántico, pola súa banda, considerou a reunión “extraordinariamente positiva” e, do mesmo xeito que o vicepresidente, transmitíronlle á ministra o seu agradecemento e apoio nas dúas cuestións, a conexión ferroviaria e as peaxes, máis importantes para o organismo.
José María Costa resaltou que estes proxectos demostran que, “ata en épocas de crises, pódese facer moito con pouco diñeiro”, informou o Eixe Atlántico nun comunicado.