A Cañiza | O pasado venres, 14 de febreiro, o Alcalde Luis Piña e a Teniente de Alcalde María José Rodríguez asistiron en Santiago á presentación da oferta turística que este Tour Operador lanza para o ano 2025, nun acto celebrado no restaurante do Monte do Gozo, ás 20:30h e no que participaron ademáis dos Alcaldes, os axentes turísticos da Comunidade Autónoma e por suposto da nosa zona.
Segundo manifestou o Alcalde Luis Piña “a empresa oferta conxuntamente neste 2025 os activos turísticos da Cañiza, Covelo e Mondariz Balneario para atraer viaxeiros e dinamizar o noso territorio”.
Do mesmo xeito que xa fixeran en “FITUR”, o equipo da empresa Enjoy Travel Group presentou en Santiago os seus novos produtos en Galicia, nos que destacan os activos turísticos dos nosos Concellos ademáis do Camiño de Santiago e o Camiño da Estrela.
Un ilusionante impulso para o sector turístico da Cañiza que verá potenciada a promoción dos activos endóxenos, coas paixases e a gastronomía como referentes ademáis de dar a coñecer as excelentes conexións da Cañiza con toda Galicia e o resto de España. Neste punto o Alcalde Luis Piña destacou “a proximidade da Cañiza con Ourense e a conectividade con Madrid, a través do Ave Ourense -Madrid, sen esquencer as comunicacións da Cañiza con Portugal”.
Enjoy Travel Group está formado por un equipo de profesionais cunha experiencia acumulada na industria turística de mais de 20 anos e oficinas de representación en mais de 11 países, presentes en América, no Caribe e en Europa.