Escribo estas liñas contra quen considera a nosa terra “zona de sacrificio”. “Nin Altri nin minas contaminantes” é un berro unánime de quen lle quere a este país. Debemos resistir e opoñérmonos a quen pretende arruinar a ría de Arousa e a comarca da Ulloa e os seus postos de traballo limpos, a cambio dun enriquecemento ilícito que non é para o pobo galego.
A natureza non se vende. Hai que coller dela o que precisamos para vivir, danándoa o mínimo posíbel e restaurándoa con cariño. Porén isto é un espolio salvaxe que nos queren impoñer en contra do clamor popular.
“A natureza non se vende. Hai que coller dela o que precisamos para vivir”
O río Ulla xa está nun estado delicado e non vai resistir esa brutal agresión. Non queremos máis plantacións de eucalipto, que xa son unha praga e un perigo porque matan a vida e arden con extrema facilidade. Queremos defender o noso patrimonio histórico arqueolóxico vencellado ao Camiño de Santiago ou previo a este e tamén preservar o patrimonio natural. Pasado, presente e futuro do noso país. Asociádevos, manifestádevos e contribuíde economicamente, co voso traballo e loita.
Xogámonos moito e xa estamos queimados (e non de esquiar…).
Ramón Coira Luaces (Ourense)
