A Coruña | A alcaldesa, Inés Rey, presentou esta mañá xunto co director do Teatro Rosalía, Paulo Rodríguez, a obra “El príncipe constante”, de Calderón de la Barca, que a Compañía Nacional de Teatro Clásico representará mañá e o sábado, ás 19.30 horas, dentro do Ciclo Principal.
Acompañada do director da agrupación, Lluis Omar, o actor Arturo Querejeta, e a actriz Beatriz Argüello, a rexedora falou de excelencia como un termo que constatan as propostas escénicas que se presentan no Rosalía, que xa de por si é unha referencia. Engadiu que a excelencia leva ao prestixio e que o prestixio da cidade é o que provoca que unha compañía do nivel da CNTC escolla A Coruña como primeira itinerancia de “El príncipe constante”. Rey lembrou a relación frutífera que garda A Coruña coa institución e destacou que a obra supón unha reflexión sobre a condición humana, a liberdade fronte ao destino e o compromiso ético.
Rey indicou que igual que o príncipe, a cidade tamén é constante no seu apoio ao sector cultural e na loita por recuperarmos unha normalidade ansiada: “O Rosalía foi un dos primeiros teatros en retomar a súa actividade e seguiremos traballando por non lle privar á cidadanía dunha parte fundamental na súa formación como é a cultura”.
“Rey indicou que igual que o príncipe, a cidade tamén é constante no seu apoio ao sector cultural e na loita por recuperarmos unha normalidade ansiada”
Pola súa parte, o director do Rosalía, Paulo Rodríguez, explicou que se trata da primeira produción da agrupación con Lluis Omar á fronte, unha peza apalabrada desde hai tempo nesa procura do Concello por manter acesa a chama das artes escénicas e por ter unha programación regular e de calidade.
O propio Omar falou da necesidade de tomarmos consciencia da dimensión que ten a obra de Calderón de la Barca e que na proposta de Xavier Albertí o máis importante son o texto e a palabra, “a vontade de facer chegar a historia tal e como a pensou Calderón”. Neste aspecto, Beatriz Argüello remarcou que na posta en escena deixan espazo para que as persoas espectadoras sintan, escoiten e imaxinen e, por último o seu compañeiro de reparto, Arturo Querejeta, matizou que na España tan difícil de Calderón, este foi quen de entrar no barroco para nos dar un camiño para seguir de cara a conseguirmos a liberdade.
As persoas interesadas en asistir á montaxe poden adquirir as súas entradas a través da web https://corunacultura.sacatuentrada.es/ ou no despacho da praza de Ourense, de luns a xoves, das 10.00 ás 14.00 e das 15.00 ás 18.00 horas. Os venres abren das 10.00 ás 15.00 horas. O teatro tamén despachará localidades os días das funcións, das 16.00 ás 20.00 horas.
