Ourense | Acreditar a Galicia como “Zona Azul” do planeta (só existen cinco zonas catalogadas así pola alta concentración de persoas centenarias na súa poboación), coa especial incidencia da provincia de Ourense, é o obxectivo dun estudio que están a realizar recoñecidos demógrafos a nivel mundial como é o caso de Michel Poulain, profesor emérito da Universidade Católica de Lovaina (Bélxica) e gran experto en lonxevidade.
Poulain, acompañado polo seu equipo así como por José María Failde Garrido, presidente da Sociedade Galega de Xeriatría e Xerontoloxía, visitou Ourense.
Por este motivo, a Deputación está a colaborar activamente con este importante obxectivo, polo que hoxe tivo lugar unha reunión de traballo entre os responsables deste estudo e o presidente provincial, Luís Menor, quen salientou que Galicia en xeral, e Ourense en particular, parece reunir os requisitos para esa cualificación, “o que demostra que somos unha terra con hábitos saudables e servizos de calidade, ademais de promover accións saudables para que non sexa só unha idade avanzada senón tamén de calidade”.
Lonxevidade poboacional
Michel Poulain lembrou que xa tivo referencias de Galicia desde tempo atrás pola colaboración co profesor Faílde. No tocante ao obxecto do estudo, diferenciou entre a lonxevidade individual e outra a poboacional, que é o que se está a estudar. Precisamente, destaca que “Galicia é un lugar especial con tradicións que facilitan o coidado e calidade da vida aos maiores”.
Aínda sen “zona azul” polo de agora, o demógrafo recoñece que “Galicia e Ourense son modelo de lonxevidade e envellecemento saudable”, polo que matizou que “o importante é demostrar agora por que a poboación neste punto do mundo ten esta lonxevidade. Todos os signos son moi positivos”, dixo, sinalando que neste estudo veñen de descubrir “centenarios felices e ben coidados” e destaca o modo de vida e de relacionarse da xente maior, onde prima a tranquilidade.
47 concellos na provincia de Ourense
O presidente da Sociedade Galega de Xeriatría e Xerontoloxía, José María Faílde, explicou pola súa banda a metodoloxía de traballo que están a seguir neste estudo proceso de intentar acreditar a Galicia como “zona azul”, un traballo científico “para o que precisamos a colaboración de alcaldes para achegarnos a datos que precisamos para o traballo”.
De feito, están a traballar con 66 concellos de Galicia, sendo 6 de Pontevedra, 3 de Lugo e 47 da provincia de Ourense, que destacan por ter uns altos índices de lonxevidade, “de aí que esteamos analizando eses datos polo miúdo para ver si podemos confirmar esa declaración”. Logo dunha primeira fase no mes de maio, agora trabállase dun segundo momento nos rexistros civís, cos padróns e logo queda procesar eses datos. Houbo ademais entrevistas para estudar estilos de vida e factores xenéticos.
Colaboración activa da Deputación
Dentro desta fase de contacto coas entidades locais, a Deputación colabora activamente poñendo en contacto aos artífices do estudo cos alcaldes e alcaldesas, coa fin de que poidan observar de forma directa realidades de persoas lonxevas na provincia e os factores que a favorecen, conectando coas administracións locais que concentran máis centenarios para que lles faciliten todos os datos posibles para avanzar nun mapeado da provincia e que científicamente se poida demostrar a prevalencia da ultralonxevidade nunha parte importante da poboación. Precisamente, neste eido, a reunión de traballo completouse cos alcaldes e alcaldesas de Xinzo, Ribadavia, Cenlle e Celanova, que se puxeron a disposición de Poulain e Faílde para aportar información para este importante estudo.
