Mos | A alcaldesa de Mos, Nidia Arévalo, participou esta tarde na inauguración da mostra solidaria da pintora Malís, Alicia Sarmiento.
A exposición presentouse ás 19.30 horas no Pazo de Mos e consiste nun proxecto solidario no que colabora a Fundación Pazo de Mos.
Coa venda das obras expostas recadaranse fondos destinados á entidade Aldeas Infantiles para o seu proxecto con nena/os refuxiada/os de Ucraína.
Trátase dunha exposición solidaria que consta de aproximadamente 50 pezas de arte, de maior e menor tamaño, cun prezo de inicio para os máis pequenos de 15 euros, que se poderá aumentar segundo a cooperación que cada unha das persoas asistentes estea disposta a dar pola causa.
A Fundación Pazo de Mos, ao fin de colaborar no desenvolvemento de proxectos de promoción de arte e cultura en todas as súas formas, está gratamente sorprendida con esta iniciativa, dada a súa vertente social, educativa e transformadora.
Xurado avalía as propostas para o Himno de Mos
Esta tarde reuniuse o xurado profesional para valorar as 6 propostas candidatas a letra do Himno de Mos. Valentín García, Secretario Xeral de Política Lingüística da Xunta de Galicia, forma parte deste xurado.
Os demais membros deste xurado son:
Nidia Arévalo, alcaldesa de Mos.
Xulio Lorenzo, compositor da partitura do Himno de Mos.
Xaime Estévez, compositor e mestre de Música.
Jacobo Gaspar, compositor e vicedirector do Conservatorio de Vigo.
Juan Durán, compositor e subdirector xeral de Ensinanzas de Réxime Especial de Música de Galicia (conéctase de modo telemático desde A Coruña).
Técnico/a municipal (secretario/a do xurado), Alba Bugarín.
Uxía e Javier Baquero, que non puideron estar hoxe presentes, emitiron a súa acta de voto por escrito.
O procedemento de votación popular permanecerá aberto ata o vindeiro domingo 15 de maio ás 12 da noite. A cidadanía aínda pode votar a candidatura para escoller a letra do himno de Mos. Un total de 6 cancións aspiran a converterse na letra do himno do Concello de Mos, composición musical autoría do gaiteiro de Louredo, Xulio Lourenzo, que carecía de letra.
Os temas coas 6 letras diferentes poden lerse e reproducirse para escoitalas nunha sección habilitada a tal fin na páxina web municipal á que se pode acceder a través da seguinte ligazón: https://www.mos.es/votar-candidatura-para-elegir-a-letra-do-himno-de-mos/
Todas as persoas interesadas en votar por algunha das candidaturas aspirantes deben votar cubrindo un formulario no que especifiquen nome, apelidos, enderezo e o número asignado ao participante ao que lle queren dar o seu voto.
As propostas son anónimas para que a votación sexa o máis ecuánime, xusta e imparcial posible. Todas elas están cantadas pola mesma voz para este proceso de votación, en aras de evitar que voces diferentes puidesen influír tamén na decisión dos votantes. O encargado de cantalas todas é o compositor e cantante Raúl Ben, que por suposto non participa no concurso.
A semana do 16 de maio votarán os voceiros dos diferentes grupos integrantes da Corporación Municipal.
A proposta gañadora extraerase sumando as porcentaxes de puntuación do seguinte xeito: Xurado Profesional (50 % da puntuación), Corporación (25% da puntuación) e Xurado Popular (25% da puntuación). A letra que resulte vencedora aprobarase oficialmente en Pleno o 30 de maio.
XURADO
Xurado Profesional (50 % da puntuación).
Corporación (25% da puntuación):
Esta puntuación acadarase a través dunha mesa de traballo formada por cada un dos voceiros de cada partido político.
Xurado Popular (25% da puntuación):
Poderán votar todas aquelas persoas que o desexen. Só será contabilizado un voto por persoa e unicamente poderase votar a través da aplicación específica “A letra do noso himno” creada para tal fin, e que estará vinculada única e exclusivamente á web municipal.
A decisión do xurado é inapelable, polo que non poderá ser obxecto de recurso de ningún tipo.
