Vigo | A Feira Internacional da Industria Naval – Navalia acollerá na súa novena edición unha nova Zona de Innovación, un espazo que axuntará emprendemento, talento novo e novas ideas en torno ao sector, grazas ao apoio do Consorcio da Zona Franca de Vigo.
A sede do Consorcio acolleu hoxe a presentación desta Zona de Innovación coa participación do Delegado do Estado na Zona Franca, David Regades; a Terceira Tenente de Alcalde do Concello de Vigo e deputada do Parlamento de Galicia, Elena Espinosa; o Alcalde de Vigo e Presidente do Consorcio, Abel Caballero; o director de Navalia, Javier Arnau; o seu presidente, José García Costas; e o presidente territorial da Asociación de Enxeñeiros Navais e Oceánicos de España (AINE), Jorge Dahl.
A Zona Franca posúe un firme compromiso coa promoción e o apoio ás feiras sectoriais de Vigo e a súa área de influencia. No caso do sector naval e da novena edición de Navalia, o Consorcio reforza o seu papel de colaborador institucional e volverá contar cunha destacada presenza no recinto de exposicións, coa Zona de Innovación como unha das principais novidades deste encontro sectorial de referencia en Europa.
David Regades, Delegado do Estado no Consorcio da Zona Franca de Vigo, destacou hoxe na presentación da Zona de Innovación que Navalia “é xa un referente en España e en todo o sur de Europa” e “unha ferramenta de promoción e punto de encontro de todo o naval”. Ademais, puxo en valor o compromiso da Zona Franca de Vigo con todas as feiras e, de forma especial, coas implicadas na industria e a economía de Vigo e de Galicia. “Somos un aliado para todas estas citas”, sinalou.
O Delegado explicou que “Vigo non se pode entender sen o sector naval. É un referente pola calidade dos seus estaleiros e pola súa industria auxiliar pero tamén pola súa capacidade de diversificación e a súa competitividade a nivel internacional”.
Apuntou tamén que é un sector consolidado, en proceso de cambio e transformación e “estratéxico para a Economía de España e para a de Galicia, que se enfronta a novos retos como son a transición dixital e enerxética, a sustentabilidade ambiental, a diversificación ou a formación e capacitación de traballadores” e, neste escenario, dixo, “para o Consorcio da Zona Franca de Vigo, a innovación é unha panca fundamental para o impulso da Economía e, como non pode ser doutra forma, tamén para o sector naval”.
Regades apuntou que “o naval é un sector de alta especialización tecnolóxica e especialmente intensivo en I+D+i e a automatización de procesos, o desenvolvemento de sistemas de propulsión máis sostibles nos buques con hidróxeno renovable ou sistemas mixtos, ou a eólica mariña son liñas de acción estratéxicas que poden constituír un importante revulsivo para o avance e modernización do naval”.
Finalmente, sinalou que o Consorcio da Zona Franca de Vigo está a traballar co sector, para o desenvolvemento de novas ferramentas, e avanzou que se está valorando a creación dunha aceleradora vertical como as que xa se puxeron en marcha noutros sectores.
Pola súa banda, Javier Arnau, director de Navalia, expresou o seu agradecemento á Zona Franca de Vigo polo seu apoio e sinalou que “a feira e o sector sempre quixeron ter un espazo de innovación, onde se recollan a iniciativa, o emprendemento e o talento novo, pero tamén onde aquelas empresas que están a empezar a súa andaina, que teñen grandes ideas, poidan presentalas ao sector e conseguir apoio das institucións e financiamento para que os seus proxectos sexan unha realidade”.
“Este espazo de innovación da Zona Franca de Vigo é o primeiro paso doutras moitas iniciativas”
Arnau explicou que “este espazo de innovación da Zona Franca de Vigo é o primeiro paso doutras moitas iniciativas que queremos que xere: queremos poñer o noso granito de area para que estes proxectos sexan un éxito en breve e que estaleiros e industria auxiliar os implante nos seus procesos produtivos”.
Tamén participou na presentación de Navalia, Jorge Dahl, presidente territorial da Asociación de Enxeñeiros Navais e Oceánicos de España (AINE), entidade que colaborou para dotar de contido e captar empresas, proxectos e startups para a Zona de Innovación, quen sinalou que neste espazo “poderemos atopar proxectos de enxeñeiros que dan resposta a retos do sector naval como a dixitalización, as enerxías de orixe mariña, a náutica deportiva, a descarbonización e novos combustibles ou os buques autónomos non tripulados”.
Dahl destacou ademais que “un reto por encima de todos eles é a captación de talento” e agregou que a Zona de Innovación “ademais de ser un escaparate que permitirá aos emprendedores presentar produtos a posibles interesados en comercializalos, tamén axudará a captar novo talento, novos enxeñeiros”. José García Costas, presidente de Navalia, agradeceu á Zona Franca o seu apoio e participación no evento e manifestou que é unha institución “importantísima para Vigo, absolutamente necesaria e imprescindible para o desenvolvemento de numerosas actividades”.
Así mesmo, reiterou a necesidade de atraer e formar talento para o sector: “cada ano os empresarios tentamos captar todo o talento dos nosos mozos e formalos para ser máis competitivos. Temos un déficit enorme de persoas formadas para este sector”.
O presidente de Navalia avanzou algunhas das principais cifras do evento e dixo que “temos garantidos máis de 500 expositores, algo máis de 1.000 marcas representadas de 75 países e un obxectivo de 20.000 visitantes profesionais”. Ademais, indicou que “é a mellor edición de todas as que se fixeron ata o de agora, con máis expositores e máis metros contratados” e engadiu que desde a organización xa se está traballando en Navalia 2026.
Elena Espinosa, Terceira Tenente de Alcalde do Concello de Vigo e deputada no Parlamento de Galicia, fixo un recoñecemento ao sector naval, ao que equiparou a “un gran atleta ao que lle foron subindo o listón, pero que o foi superando día tras día”.
Neste sentido, dixo que “cando celebramos Navalia facemos un recoñecemento ao esforzo deste sector, ao que hoxe pedimos que colabore na loita contra o cambio climático, con propulsións novas, achegas á descarbonización, etc. e que sexa capaz, ao mesmo tempo de ser competitivo nun mercado cada vez máis complicado”. Espinosa indicou que en Navalia “seremos ese gran polo de atracción para o resto do mundo polo noso bo facer e polo bo facer de todos os estaleiros que se concentran na cidade” e expresou o seu desexo de que esta edición “sexa a mellor de todas as edicións” da feira.
Finalmente, o Alcalde de Vigo e Presidente do Consorcio da Zona Franca de Vigo, Abel Caballero, destacou que “Navalia é un gran corazón da economía da cidade” e apuntou que “é un lugar de encontro do naval de España e de Europa e iso colócanos na liña de cabeza, no punto de saída do que queremos seguir sendo”. Caballero engadiu que “o naval é parte central da nosa historia e do noso futuro, por iso é tan relevante esta feira” e manifestou que Vigo “é unha cidade que a través deste sector viu crecer a capacidade de lanzarse a outras aventuras industriais”. Ademais, destacou a necesidade de “lanzar unha chamada á xente nova para que se incorpore nos procesos de formación para desenvolver a súa carreira profesional nesta área” e agregou que “cada vez máis o transporte marítimo vai xogar un importante papel na globalización e no futuro temos que estar preparados para o que suceda”. Vigo e Galicia, referentes para os distintos sectores da industria naval
O Instituto Feiral de Vigo – IFEVI acollerá os próximos días 21, 22 e 23 de maio a novena edición de Navalia, a feira bienal máis importante do sector naval en España e unha das máis influentes de toda Europa.
Vigo reedita nesta novena entrega da feira Navalia a súa condición de cidade anfitrioa e fortalece a súa posición no sector a todos os niveis, do mesmo xeito que Galicia, que conta cun destacado atractivo para os axentes nacionais e internacionais do sector, dada a importante concentración de estaleiros, infraestruturas e industria auxiliar, a longa tradición e experiencia na construción de buques e outras embarcacións e a proximidade ao propio recinto feiral de moitas das factorías de referencia no sector. En Navalia danse cita ademais representantes da industria offshore, a industria auxiliar, os servizos de enxeñería, armadores, servizos marítimos, autoridades portuarias, institucións e entes públicos.
