Sober | A Xunta de Galicia acaba de iniciar unha nova fase de escavación no xacemento arqueolóxico de Proendos, en Sober, onde a finais do pasado ano se consolidou o primeiro hórreo romano con disposición dos muros en paralelo que se coñece no noroeste da Península Ibérica. Os traballos contan cun investimento de 17.800 euros.
Nesta ocasión, os profesionais da empresa Tempos Arqueólogos SL centraranse durante dez días na escavación dunha área duns 50-60 m2 preto do horreum, para poder exhumar os posibles restos da vila romana detectada na prospección xeofísica realizada no ano 2023.
A prospección con xeorradar cubriu unha superficie aproximada de 15.000 m2 ao redor do horreum e tivo resultados moi positivos ao localizarse na maioría das zonas prospectadas restos arqueolóxicos, destacando unha gran estrutura rectangular con estancias asociadas a un patio, que podería tratarse dun perístilo ou espazo residencial dunha vila romana (complexo agrario desde onde se administrarían as terras da contorna e se almacenaría a produción do campo).
A Consellería de Cultura, Lingua e Xuventude investiu preto de 130.000 € no xacemento romano de Proendos desde o ano 2020, a través de 6 campañas arqueolóxicas.
