Ourense | Onte venres e durante a celebración do tramo urbano do Rallie de Ourense, chamou a atención de moito do público congregado nos arredores da rúa Victoria Kent a presenza de persoas na cuberta do edificio da Xefatura da Policía Local de Ourense e mesmo nalgún dos balcóns do edificio, concretamente o do despacho da Intendente, para seguir a proba mesmo co consumo de bebidas e comida.
O grupo municipal do BNG denuncian “a utilización dun edificio municipal como se da terraza dunha cafetería se tratase, feito que consideran moi grave xa non só pola presenza de persoas alleas á institución senón que no caso concreto do edificio ocupado, estamos a falar nada máis e nada menos que da Xefatura da Policía Local, lugar onde se custodian armas e documentación sensible”.
Os nacionalistas pedirán explicacións ao concelleiro de seguridade Telmo Ucha para coñecer quen autorizou a utilización da sede da Policía Local coma se dunha terraza de cafetería ou dun palco VIP se tratase e autorizou a presenza de persoas na cuberta e nos balcóns do edificio. Igualmente quere coñecer de que persoas se trataba.
Segundo o BNG, estamos diante dun feito gravísimo que esixe rápidas explicacións e mesmo a depuración de responsabilidades xa que non se poden empregar edificios municipais, e moito menos aqueles de especial relevancia como é a Xefatura da Policía Local, como se fosen de propiedade particular do concelleiro de turno. Lembran que precisamente a cuberta da Xefatura, atópase pendente da instalación da denominada “liña de vida” que impida que calquera persoa se poida precipitar ao baleiro tal e como esixen os técnicos de prevención de riscos laborais ao tempo que reiteran que o acceso tanto a determinadas zonas do edifico como á propia cuberta está restrinxido exclusivamente ao persoal autorizado.
