As Neves | A Comunidade de Montes de Taboexa puxo a disposición dos veciños e veciñas o seu Centro de Interpretación do Patrimonio e Cultural para facilitar a presentación das alegacións ante a Xunta de Galicia ofrecendo modelos de alegación e de autorización e tramitando a presentación directamente na sede electrónica.
Oscar González, Presidente da Comunidade, explica que se creou este sistema a disposición de calquera que quixera mostrar a súa oposición a este parque: “A nosa posición é clara. Non ao impacto visual e paisaxístico, non ao impacto sonoro pola escasa distancia a poboación, non aos danos irreparables nas traídas de augas, non a perda de terras das comunidades de montes, non ao impacto cultural. Non a esté parque eólico no monte San Nomedio é a posición que compartimos coas outras comunidades de montes e tamén traídas de augas”.
Persoas voluntarias recolleron alegacións de familiares e veciños e outras ofrecéronse para axudar na tramitación ata o pasado día 20 que rematou o prazo.
Chegaron a estar catro persoas a un tempo tramitando as alegacións na sede electrónica da Xunta de Galicia ante a Consellería de Medio Ambiente e Cambio Climático e o departamento territorial da Consellería en Pontevedra.
