O Porriño | A Concellería de Urbanismo e Patrimonio, dirixida polo nacionalista Pedro Pereira, informa da sinatura en notaría das escrituras de compra de varias parcelas situadas na contorna do río Louro. Até o momento formalizouse o pago de fincas que suman unha superficie de 8.105.80 m2.
Esta semana asinaranse novas escrituras coas que xa hai acordo de compra. En total a nova zona verde para uso público sumará un total de 20.285,55 m2. O importe da compra ascende a 364.131´01 €.
Pedro Pereira, actual alcalde en funcións, agradeceu en nome do Concello do Porriño a boa predisposición das anteriores propietarias que desde o primeiro momento ao ser contactadas mostraron a súa colaboración para que o Concello conte con este espazo de desfrute para veciños e veciñas do Porriño.
“Hai que apostar por abrir o entorno do río ás persoas. A contorna do Louro é o pulmón verde que o centro urbano precisa e esta compra é un primeiro paso necesario para transformar este espazo”, apuntou Pedro Pereira.
O alcalde en funcións afirmou que a recuperación integral do lugar non será completa “mentres o matadoiro permaneza na súa localización actual e o tren siga a cruzar polo medio a vila do Porriño. O concelleiro de Infraestruturas chamou a “traballar desde a institución municipal para acadar un soterramento ambicioso da vía e negociar un traslado do matadoiro, dous obxectivos cruciais para o futuro do Porriño”, concluíu.
Presentación oficial da carreira “Nocturna de Reis”
O triatleta Gustavo Rodríguez será o padriño da presentación oficial da Carreira Nocturna de Reis que organiza a Concellería de Deportes do Porriño. A carreira, que este ano substitúe á San Silvestre, celebrarase o 8 de xaneiro, nun percorrido urbano de 3 quilómetros.
A presentación do evento terá lugar mañá martes ás 11.00 horas no Polideportivo Municipal.
Xunto a Gustavo Rodríguez intervirá o concelleiro de Deportes, David Alonso, quen comentará os detalles da organización e como vai a inscrición, que permanece aberta ata o 3 de xaneiro.
