Ponteareas | A Asociación de Nais e Pais do IES Val do Tea de Ponteareas e o equipo de dirección convidan a toda a comunidade educativa á I Xornada de Itinerarios e Orientación organizada en colaboración coa Federación de Asociacións de Nais e Pais (FANPO).
O vindeiro xoves día 2 de xuño ás 19 horas terá lugar no salón de actos do instituto unha xornada informativa na que os equipos de dirección e de orientación dos tres institutos de Ponteareas e do CIFP A Granxa asesorán ás familias dos múltiples itinerarios que pode seguir o alumnado.
Orientadoras e orientadores dos catro centros traballan xuntos no deseño desta xornada na que ademais de ofrecer toda a información dispoñible sobre formación conversarán coas familias sobre o mellor xeito de abordar o futuro educativo do alumno/a.
Ferramentas para decidir en familia, información sobre a oferta pública de ciclos, pautas para seguir diferentes itinerarios, accesos á universidade sen cursar bacharalato, educación para adultos e alternativas para alumnado con necesidades especiais son algúns dos temas que abordarán as e os orientadores dos centros educativos de Ponteareas.
Equipos directivos e de orientación do IES Val do Tea, IES do Barral, IES Pedra da Auga e CIFP A Granxa, falarán coas familias co obxectivo de resolver dúbidas, axudar na toma de decisións e ofrecer a máis ampla información posible.
“Que fago ao rematar secundaria ou que pasa se non me gusta o ciclo ou carreira que elexín” son algunhas das preguntas máis frecuentes ás que teñen que dar resposta as familias nesta etapa.
Coñecer a extensa lista de posibilidades que existen, entender que temos o dereito a equivocarnos, comprender que un estudo pode non reunir as expectativas agardadas, definir quen toma a decisión sobre o itinerario e estudos que quere cursar o alumno/a, non facer dunha decisión un conflito ou imposición ou como retomo os meus estudos son algunhas das cuestións que abordarán os profesionais dos nosos centros educativos na xornada de Itinerario e Orientación.
“O persoal orientador informará sobre as ofertas educativas de cada centro, explicará as características máis salientables do bacharelato, da oferta de educación para maiores de 18 anos, da FP e doutras posibilidades que axuden a tomar decisións sobre un itinerario académico-profesional, acorde ao alumno/a e ao seu contexto sociofamiliar”, explican as orientadoras participantes.
