O Covelo | As súas maxestades as Raíñas e Reis de Oriente ultiman os preparativos para a súa visita oficial ao Concello de Covelo. O vindeiro día 6 visitarán as parroquias e o centro urbano parándose a saudar nos negocios de hostalaría, nas prazas e nas casas e centros culturais.
Segundo fontes oficiais, a comitiva de Gaspar sairá dende Fofe ás 17:00 horas para ir a Piñeiro, logo ás 17:30 chegar a Barcia de Mera, ás 18:00 horas en Casteláns e ás 18:30 entrar na praza Mestre Cerviño. O séquito de Baltasar sairá ás 16:30 dende A Graña para ir a Campo, ás 17 horas a Godóns, 17:30 San Salvador de Prado e 18 horas en Maceira destino á praza Mestre Cerviño. O cortexo de Melchor sae ás 16:30 horas dende Prado da Canda; para estar ás 17 horas na Lamosa, ás 17:30 en Paraños e ás 18 horas en Santa Marina.
Paxes, raíñas e reis xuntaranse na praza Mestre Cerviño arredor das 18:30 horas onde serán recibidos con música e baile antes de ir visitar ás persoas maiores da residencia. A continuación desfilarán cara ata o pavillón municipal. Zancudos máxicos agardarán as súas maxestades no pavillón onde tamén haberá inchables, batalla de bolas xigantes, pista ameriana, tobogán de bolas, música e animación.
A comitiva real entregará un agasallo doce ás nenas e aos nenos e haberá chocolate quente con rosca para celebrar a visita das Raíñas e Reis Magos de Oriente e comezar así o ano cargado de ilusión e sorrisos.
