Tui | Este 4 de xuño tivo lugar o Pleno da Cámara de Comercio de Tui nas instalacións da Comandancia Naval do Miño.
Durante a sesión, as empresas pertencentes ao Pleno mantiveron unha reunión co Comandante da Mariña, D. Andrés Díaz-Ripoll, o Comandante do Cabo Fradera, D. David Pacheco e o Alcalde do Concello de Tui, D. Enrique Cabaleiro, con o obxectivo de seguir colaborando polo interese xeral do comercio, industria, servizos e navegación da demarcación.
Entre os temas tratados, o Alcalde de Tui volveu mostrar o seu apoio á Cámara de Comercio de Tui no seu obxectivo de poder iniciar en breve a rehabilitación do antigo edificio da Aduana, propiedade da Cámara dende 2015.
Trátase dun edificio emblemático para a cidade, situada nun punto estratéxico da comarca, no paso fronteirizo entre Valença e Tui, motivo principal polo que é de gran importancia a recuperación destas instalacións, co obxectivo de que a Cámara poida ofrecer novos servizos ao distrito.
Así mesmo, todos os presentes destacaron a importancia de buscar solucións ás algas invasoras que dificultan os labores de pesca no río Miño, ao tempo que se converteu nun grave problema para a navegabilidade e seguridade dos usuarios do río.
Por outra banda, quedou patente a necesidade de acometer accións de dinamización turística no Concello de Tui, sendo fundamental reivindicar o papel do Camiño de Santiago na cidade e as actividades arredor do río Miño. Todas as institucións coincidiron en mostrar a súa total disposición a seguir traballando conxuntamente polo ben do tecido empresarial da comarca e poñer en valor as virtudes do territorio.
