Ponteareas | Un grupo do Instituto de Historia do Consejo Superior de Investigaciones Científicas (CSIC) investiga o “castro mineiro” da Croa, en Ribadetea. Atraídos pola singularidade e polo seu potencial patrimonial e científico estudan este asentamento feito en tempos de Roma e construído empregando as mesmas técnicas coas que Roma abría as minas de ouro, coa forza da auga, desviando os ríos con canles e lavando a terra onde estaba o prezado mineral.
A alcaldesa, Nava Castro, acompañada do Concelleiro de Ensino, Ricardo González, e da Concelleira de Urbanismo, Silvia F. Táboas, visitou a zona para coñecer de primeira man os traballos que se están executando. Esta colaboración entre o CSIC e o Concello permitirá coñecer a estrutura deste asentamento e comparalo cos castros da Idade de Ferro, e tamén con outros castros romanos relacionados coas minas escavados na Asturia romana, no occidente leonés e na zona das serras orientais galegas como Ancares ou O Courel.
Estes novos asentamentos, como o da Croa, executáronse no marco dunha reestruturación do territorio co obxectivo de explotar os recursos auríferos para o beneficio do Imperio en todas as zonas mineiras do noroeste ou de Asturia e Gallaecia. Subliñan os investigadores que todo o sur do Castro ata o campo de fútbol de Ribadetea é unha mina de ouro aberta por Roma.
A alcaldesa sinala que tenderán a man ao equipo de investigación do CSIC para futuros traballos nos que afondar na historia de Ponteareas e recuperar espazos simbólicos que poidan ser compartidos e admirados pola cidadanía.
Estas investigacións están enmarcadas no proxecto do Ministerio de Ciencia INDIGENAE, dirixido por Brais Currás do grupo de investigación EST-AP, que intenta comprender a complexidade cultural deste tipo de asentamentos. Adiantan os investigadores do CSIC que estes sitios son unha realidade híbrida a medio camiño entre o mundo romano e o mundo dos castros porque por un lado teñen a forma dos antigos asentamentos da idade do ferro pero están construídos coa nova tecnoloxía que trae o Imperio Romano. Equipados cun xeorradar, tecnoloxía que permite identificar as estruturas do subsolo sen realizar unha escavación, agradecen a colaboración do Concello na limpeza e desbroce da zona, indispensables para iniciar as pescudas.
Dende o CSIC agardan que este sexa un primeiro paso e amosan o seu interese en realizar máis traballos no castro para poder abrir unha ruta explicada neste asentamento mineiro e explotacións auríferas.
