Ponteareas | O Concello de Ponteareas informa que no marco da liña 3 do programa +Provincia 2025 da Deputación de Pontevedra oito persoas desenvolverán o seu servizo no departamento de desbroces.
A alcaldesa Nava Castro, o concelleiro de Desbroces, Domingo Freitas e o concelleiro de Réxime Interior, Jesús Cao, deron a benvida a estas novas traballadoras e traballadores que durante nove meses contribuirán a mellorar o centro urbano e as 24 parroquias.
Ata o 31 de decembro, de luns a venres e a xornada completa as e os novos traballadores realizarán tarefas de desbroces, de limpeza de maleza e de embelecemento dos xardíns en espazos públicos dentro das competencias do Concello. O concelleiro de Desbroces recoñeceu a complexidade do labor diario destas persoas “xa que asumimos un cometido duro ao ser moi extenso o Concello, 125,5 km2, e moi frondoso nas zonas rurais”, o concelleiro explicou a metodoloxía de traballo, os horarios e as prioridades do servizo.
Pola súa banda alcaldesa e concelleiro de Réxime Interior salientaron a importancia do servizo que prestarán estes novos empregados que actuarán en espazos que son de uso de toda a cidadanía.
Máquina de pintado sobre asfalto
O Concello de Ponteareas merca unha máquina de pintado sobre asfalto co apoio da Deputación de Pontevedra. O alcalde en funcións, Juan Carlos González, explica que esta maquinaria será utilizada polos traballadores do departamento de vías e permitirá realizar un mellor mantemento das distintas marcas viarias.
Os traballadores do departamento de Vías realizaron unha xornada de formación na práctica na contorna de Pardellas para a correcta utilización deste novo aparello co que pintarán pasos de peóns e as marcas viarias que recolle a normativa.
González Carrera adianta que a adquisición de ferramentas facilita e axiliza o traballo dos operarios e supón un aforro de custos. “Estamos pendentes das liñas de axudas para incorporar maquinaria que contribúa a prestar servizos públicos máis eficientes”.