Ponteareas | Arredor de 20 persoas de Guillade, en Ponteareas, iniciaron un curso de bailes de salón enmarcado no programa provincial “Depo en Marcha”. Con esta iniciativa, a Deputación de Pontevedra promove a participación e a creación de espazos de encontro e intercambio de experiencias para fomentar a independencia das persoas maiores. O taller, promovido pola Asociación de Veciños San Gregorio de Guillade e organizado pola institución provincial, celébrase todos os sábados ata o 25 de novembro en horario de 19:00 a 21:00 horas.
O curso de bailes de salón é un dos 130 que se ofertaron na actual edición de “Depo en Marcha”, que beneficia a arredor de 3.000 persoas ao longo de todo o ano. A Deputación destina preto de 146.000 euros ao programa e os obradoiros enmárcanse nos seguintes apartados temáticos: ‘Aprendendo da natureza’, ‘Móvete, activando corpo e mente’, ‘Enredando’, ‘Dálle marcha’ e ‘En rede’.
