Ponteareas | A alcaldesa de Ponteareas, Nava Castro, xunto á concelleira de Urbanismo, Silvia Fdez Táboas, e á concelleira de Benestar Social, Raquel Plana, desprazáronse hoxe ata a residencia de maiores Santa Ana para revisar, en campo, os últimos detalles do proxecto cos técnicos responsables da obra.
Estas obras, orzamentadas en 800.608,73€ contan cunha axuda do Programa de Impulso a la Rehabilitación de los Edificios Públicos (PIREP) do Ministerio de Transportes e Mobilidade Sostible.
Esta intervención permitirá non só un aforro enerxético, tamén un edificio máis eficiente e confortable. O Concello da un paso máis na mellora do día a día das persoas maiores, en concreto, do día a día das 32 persoas que residen e reciben coidados en Santa Ana.
A concelleira de Urbanismo, Silvia Fdez Táboas informa que o proxecto contempla a mellora da accesibilidade no acceso principal á residencia pola rúa Santa Ana; a ampliación do número de aseos accesibles en planta baixa, xa que actualmente só existe un e é escaso para dar un servizo adecuado ao número de residentes e a mellora da envolvente térmica do edificio (fachadas, cuberta e carpintería exterior) para emendar as deficiencias existentes e mellorar a eficiencia enerxética do conxunto. Ademais tamén se substituirá a iluminación existente por unha máis eficiente co fin de reducir os custos en electricidade.
O goberno de Ponteareas, liderado pola alcaldesa Nava Castro, reitera o seu compromiso coas persoas máis vulnerables. En conformidade con isto, o goberno aprobou o investimento máis alto no servizo de axuda no fogar (SAF) cun orzamento de 5.984.640€”. O novo contrato supón o incremento de 34.800 horas pasando de 55.200 horas a 90.000 e un incremento do cadro de persoal do 200%, de 17 traballadoras a 50 profesionais a xornada completa, e dunha traballadora social a dúas. Estes incrementos permiten unha distribución horaria máis ampla, rematar coa lista de agarda de persoas dependentes de grao III e reducir a lista de espera das persoas de grao II e I. Con estas cifras estímase que se poderían incorporar ata 30 novas altas inmediatas ao tope máximo de horas (94h/mes). A este servizo súmase o SAF municipal que asiste a 31 veciños e veciñas.
Unidade Móbil de quimioterapia no Centro de Saúde
O Concello informou que o centro de saúde amplía os seus servizos para administrar tratamentos de hematoloxía aos pacientes crónicos.
A xerencia de Sanidade de Vigo explica que coa intención de avanzar no seu plan de humanización, o servizo de Hematoloxía quere achegar a administración de tratamentos crónicos aos seus pacientes. Por este motivo, a partir do venres día 4 estenderá o programa de Unidades Móbiles de Quimioterapia Ambulatoria ao SAP de Ponteareas facilitando o acceso aos usuarios de Ponteareas, As Neves, Mondariz, Mondariz Balneario, Covelo e Salvaterra.
A concelleira de Benestar Social, Raquel Plana, salienta a importancia de contar con este servizo que evitará desprazamentos e permitirá que os pacientes regresen a casa despois da sesión, buscando comodidade e calidade de vida sen comprometer a efectividade do tratamento.
BNG chama a concentración pola sanidade
O BNG vén de expresar o seu apoio á mobilización convocada pola Plataforma en defensa da sanidade pública do Condado, que se celebrará este venres ás 20:00 horas diante do centro de saúde de Ponteareas.
Así mesmo, o Bloque anima a todas e todos os ponteareáns a participar nesta concentración “ante a alarmante situación da sanidade pública en Ponteareas, con miles de veciñas e veciños sen médico asignado e tendo que agardar até cinco semanas por unha cita médica como consecuencia do recorte en persoal do PP na Xunta de Galiza”.
Especialmente “grave e intolerable” considera o BNG a situación da Unidade de Saúde Mental, que atende a poboación de toda a comarca. “As persoas que precisan atención e axuda do único psicólogo do servizo teñen que agardar máis dun ano por unha cita”, denuncian.
“Non podemos deixar que o PP destrúa a nosa sanidade pública, está en xogo a vida das persoas e temos que defendela”, concluíu o BNG.