Madrid | Renfe e a Fundación Feiras e Exposicións Ourense (Expourense) asinaron un acordo comercial para promover conxuntamente o turismo en Ourense da man do ferrocarril.
Este acordo, asinado polo director de área de negocio de Alta Velocidade e Outros Servizos Comerciais de Renfe, Javier Pérez López, e o director xerente de Expourense, Rogelio Martínez González, ten como finalidade a promoción das viaxes en tren xa sexa por turismo ou negocios á cidade termal.
Renfe ofrecerá a todos os asistentes e expositores dos eventos que organice Expourense un 10 % de desconto sobre o prezo de venda no momento da compra, en calquera das opcións dispoñibles (Básico, Elixe e Elixe Confort) en billetes de ida, ou ida e regreso, nos trens de AVE e Longa Distancia. Esta oferta é válida para Congresos ou Eventos que reúnan a máis de 75 persoas que utilicen o tren nos seus desprazamentos.
Tamén se poderán beneficiar de descontos non inferiores a un 10% os viaxeiros que contraten as súas escapadas temáticas, de turismo MICE (Meetings, Incentivos, Convencións, Eventos e Congresos) e Grupos. Na foto Javier Pérez López e Rogelio Martínez asinando o acordo.
