Salvaterra de Miño | Empeza a conta atrás para unha das festas gastronómica máis esperadas no mes de agosto, a Festa do Viño do Condado do Tea, que se celebra como todos os anos o último fin de semana deste mes. Unha festa que ano a ano segue crecendo e que trae novidades neste 2022.
Unha semana dedicada ao produto referencia no municipio de Salvaterra de Miño, ao viño do condado, que este ano amplía a súa programación ofertando máis actividades para que todos os amantes dos nosos caldos poidan desfrutar deles.
Así durante toda a semana poderemos asistir as catas comentadas, impartidas polas adegas participantes que dan a oportunidade de coñecer dunha forma máis profunda os viños das nosas adegas.
Despois do éxito do ano pasado, este ano manterase o Túnel do Viño que se desenvolverá o xoves, venres e o sábado, onde poderemos desfrutar de todos os viños participantes na Festa. O venres 26 terá lugar a inauguración oficial da festa e a partir de aí música, cultura, historia e gastronomía reinarán durante tres días nun enclave privilexiado como é o Recinto Amurallado de Salvaterra de Miño.
