Ribadumia | Esta semana a Ministra de Igualdade, Irene Montero, anunciaba, entre outras medidas de prevención e loita contra a violencia de xénero, o establecemento dunha rede de “puntos violetas”, a imaxe da rede de puntos seguros posta en marcha pola concellería de política social de Ribadumia na lexislatura pasada, sendo Enrique Oubiña concelleiro e impulsor desa inciativa.
“Descoñezo se Irene Montero sabe onde queda Ribadumia, e entendo que posiblemente non estea ao tanto de que a súa rede de Puntos Violetas toma de exemplo o noso plan ‘Conta Comigo Ribadumia”
Para o noso voceiro “descoñezo se Irene Montero sabe onde queda Ribadumia, e entendo que posiblemente non estea ao tanto de que a súa rede de Puntos Violetas toma de exemplo o noso plan “Conta Comigo Ribadumia”, pero unha vez visto o plantexamento do programa do posto en marcha polo seu Ministerio, incluído o argumentario no que se sostén, é evidente que o noso traballo chegou á capital do estado e ao equipo da ministra”.
Non é nada que deba tampouco sorprender. A realidade é que no seu momento a rede de puntos seguros e o grupo de apoio impulsado a través do plan “Conta Conmigo Ribadumia” tivo unha repercusión moi importante, tanto polo novidoso e pioneiro do plantexamento como pola acollida que tivo por parte da cidadanía e en particular dos comerciantes, hostaleiros e outras empresas que se sumaron a esta iniciativa, que supuxo poñer a pegatina de punto seguro na maioría dos establecementos e empresas do noso Concello.
“En política cando as cousas se fan ven, teñen repercusión noutras administración e é normal que plans como estes se trasladen e se adapten ás diferentes realidades. Pola nosa banda sabiamos que a experiencia de Ribadumia estaba tendo seguimento, tanto por parte doutros concellos, como da Deputación e a tamén da Xunta de Galicia, con quen mantiven algunha xuntanza gracias ao cal a Secretaría Xeral de Igualdade modificou as liñas de axuda correspondentes para poder incluír este tipo de proxectos, que ata o 2018 quedaban excluídos.
E tamén estiveron seguindo está experiencia outras forzas políticas, como no caso de En Marea, dentro da cal estaba Podemos, que estivo en Ribadumia para coñecer como se estaba desenvolvendo esta experiencia, que foi trasladada ao parlamento, co obxectivo de que as forzas de todo o espectro parlamentar tomaron como exemplo para desenvolver liñas similares”.
Dende Somos Ribadumia entendemos que o feito de que o Ministerio de Igualdade tome de referencia esta experiencia é a proba de que o noso plantexamento en canto a como se debería abordar o drama da violencia de xénero, sacándoo da escuridade na que se desenvolve, implicando a toda a cidadanía e achegando mecanismos de axuda e de prevención ás vítimas, foi moi acertado, e ao coller dimensión estatal a través dun programa do goberno central, cremos que pode supor un importante avance.
Con todo, non se trata agora de poñer medallas, se non de aportar. Por ese motivo dirixirémonos nos próximos días ao Ministerio e a propia Ministra para convidala a coñecer de primeira man a experiencia de Ribadumia, que a pesar do abandono de David Castro mantense vixente e segue, aínda que non se sexa algo visible, cumprindo a súa función e dando os seus froitos, como poden corroborar as entidades de apoio ás vítima, e consideramos que pode serlle de axuda a hora de abordar na práctica o programa do goberno.
“Dirixirémonos nos próximos días ao Ministerio e a propia Ministra para convidala a coñecer de primeira man a experiencia de Ribadumia”
Agardamos que todo isto sirva tamén para que o goberno local actual, que o primeiro que fixo ao subirse ao altar da maioría absoluta foi criticar o custe económico do Punto Morado na festa do tinto do 2019, denigrando dende o primeiro momento ás iniciativas de Somos Ribadumia e o traballo de Oubiña , así como a labor das profesionais que ata ese momento viñan realizando en Ribadumia un traballo que con independencia da nosa opinión agora confírmase como exemplar, recapacite e recupere tanto este plan como outras liñas postas en marcha por Oubiña no que respecta a loita contra a violencia de xénero, que na lexislatura pasada converteron ao noso concello nun referente.
E para rematar, queremos aproveitar para reiterar o noso agradecemento ante o compromiso e participación activa da nosa veciñanza, que demostrou no seu conxunto unha enorme madurez e compromiso social, apoiando as iniciativas que dende o goberno puxemos en marcha demostrando que aportando dente todos os ámbitos é posible construír outro concello e unha sociedade mellor.
