Ourense | O presidente provincial, Luís Menor, xunto ao deputado de Representación Institucional e presidente do Inorde, Rosendo Fernández, acompañaron a un cento de persoas con diabetes, familiares, médicos e profesionais de Enfermaría que partiron esta mañá desde Ourense para percorrer os últimos cen quilómetros da Vía da Prata do Camiño de Santiago.
A iniciativa, posta en marcha pola Fundación para la Salud de Novo Nordisk España (FSNN) e a Federación Española de Diabetes (FEDE), ten por obxectivo educar ás persoas con diabetes e sensibilizar ao resto da poboación sobre a importancia de abandonar o sedentarismo, promovendo a actividade física e unha alimentación equilibrada.
Menor felicitou aos participantes polo seu empeño e esforzo, e manifestoulles que non só alcanzarán a merecida “Compostela” tras percorrer “un dos camiños xacobeos máis fermosos, senón que lograredes algo importantísimo: educar ás persoas con diabetes e sensibilizar ao resto da poboación sobre a importancia de abandonar o sedentarismo, promovendo a actividade física e unha alimentación equilibrada”.
“Grazas a este proxecto que hoxe iniciades, as persoas con diabetes participantes teredes a oportunidade de visibilizar esta enfermidade e concienciar sobre a importancia da súa prevención e tratamento”, sinalou Menor, quen salientou que estas persoas estarán acompañadas por 5 profesionais sanitarios e 7 monitores.
