Aldea Global | Uruguai confía en Termatalia para promocionar a nivel internacional os seus recursos termais e posicionarse, por cantidade e calidade, como un dos grandes destinos termais de América.
Como firme mostra desta aposta polo turismo termal, o presidente da República Oriental do Uruguai, Luis Lacalle Pou, participou onte no acto oficial de inauguración de Termatalia Uruguai, 21º Encontro Internacional sobre Turismo de Termal, Saúde e Benestar que se celebra ata o venres día 6 en Salto e Paysandú, as dúas intendencias que configuran o “Destino Termas”. Trátase da 21ª edición de Termatalia e da quinta en América, pero esta foi a primeira vez na que un Xefe de Estado participou no acto oficial de apertura.
Acompañaron ao presidente Lacalle representantes das principais entidades vinculadas co turismo neste país, desde o propio Ministro de Turismo, Tabaré Vise e todo o seu equipo, ata representantes da CTM Salto Grande, de ANTEL (compañía telefónica), de Aeroportos de Uruguai, do Embaixador de España de Uruguai ou da Cónsul Xeral Española neste país.
Participaron ademais no acto de apertura, dirixido polo director de Termatalia, Rogelio Martínez, os dous intendentes anfitrións do evento, o de Salto (Andrés Lima), e o de Paysandú (Nicolás Olivera). A representación galega correu a cargo da Xefa da área de Termalismo da Xunta de Galicia (Belén Gómez Quevedo) que estivo arroupada pola delegada da Xunta en Uruguai, Elvira Domínguez, e polo da veciña Arxentina, Alejandro López Dobarro. O acto de apertura incluíu ademais un saúdo do presidente da European Spas Association, Thierry Dubois. Esta entidade representa ás asociacións balnearias de 25 países europeos.
Termatalia Uruguai foi tamén o escenario do anuncio en primicia, por parte do propio presidente da República, de que Uruguai será unha das sedes oficiais do Mundial de Futbol de 2030.
Volvendo ao acto inaugural, o director de Termatalia destacou a firmeza da decisión do Ministerio de Turismo de Uruguai por querer acoller este evento e celebralo en Salto e Paysandú (situadas a ao redor de 500 quilómetros de Montevideo, o seu capital), xa que aquí é onde se sitúan as instalacións termais que queren promocionar. “Esperamos que este evento obteña os mesmos éxitos que as edicións anteriores celebradas en Perú, Arxentina, México e Brasil e cuxos organizadores dixeron que a celebración de Termatalia no seu país supuxo un antes e un despois no desenvolvemento e promoción dos seus recursos termais. Desexamos que así sexa tamén en Uruguai e que podamos comprobalo a curto prazo”, indicou Rogelio Martínez.
Xerente de Expourense
Rogelio Martínez fixo referencia tamén ao feito de que “Uruguai teno todo para converterse nun destino termal de referencia, ten augas minerais en calidade e cantidade, ten infraestruturas, ten usuarios nacionais e internacionais e, sobre todo, ten moitas ganas. Termatalia Uruguai chega para completar ese interese con capacitación profesional especializada en hidrología médica, en márketing, en farmacoloxía, en investigación, en compartir casos de éxito de entidades públicas e privadas… E por este motivo estamos hoxe aquí todos contribuíndo a promocionar internacionalmente ao Destino Termas de Uruguai e convertendo a este país no epicentro do termalismo mundial”.
Ao concluír o acto de apertura, Expourense, a entidade que organiza Termatalia, regalou ao presidente Lacalle unha pintura con temática termal realizada en exclusiva para a ocasión polo artista ourensán Juan Valcárcel.
Con este acto inaugural arrincaba a primeira xornada do 21º Encontro Internacional sobre Auga e Termalismo, Evento declarado de Interese Turístico polo Ministerio de Turismo de Uruguai, e que reúne a profesionais dunha vintena de países (Alemaña, Arxentina, Brasil, Chile, Colombia, Costa Rica, Croacia, #Ecuador, Estados Unidos, España, Francia, Guatemala, Hungría México, Panamá, Perú, Portugal e Uruguai).
Entre as accións profesionais postas en marcha e vinculadas á formación especializada e ao negocio, destaca o IV Congreso Internacional sobre Auga e Saúde que conta con máis de 500 rexistrados entre presenciais e en streaming. Participan ademais máis de 70 medios de comunicación especializados en turismo acreditados.
Por Silvia Pardo.
