Santiago de Compostela | Vía Galega -que aglutina a 61 entidades de diferentes ámbitos do tecido social galego- participará activamente na manifestación convocada por Queremos Galego -da que Vía Galega fai parte- que, o 23 de febreiro, percorrerá as rúas de Compostela a prol do noso idioma para reverter a situación de emerxencia en que se atopa o galego.
A situación preocupante de perda de galego-falantes e da ruptura xeracional do uso do noso idioma responde á política lingüística despregada pola Xunta de Galiza. Unha política deseñada a perpetuar os prexuízos sobre o galego, a impedir e obstaculizar a súa utilización, a negarlle todos os dereitos e a perseguilo en diferentes ámbitos e usos.
O obxectivo é ir subordinando cada vez máis o noso idioma ao español, ilo asimilando, até a substitución lingüística total da lingua propia, o galego, pola imposta, o español. Por iso, resulta obsceno que a Xunta de Galiza e o PP continúen falando de aplicar un “bilingüismo cordial”. Unha falacia inviábel socialmente. Moito máis nunha situación de conflito lingüístico e dun contexto diglósico como o que sufrimos na Galiza.
A pretensión non é outra que seguir a impor a lingua dominante, o español, provista de todos os dereitos, en detrimento do uso do galego. O futuro para o noso idioma pasa por un cambio de rumbo radical que leve a paralizar a persecución e marxinación da nosa lingua e a promover a normalización lingüística no conxunto da sociedade.
Basta xa de argucias para manipular e enganar á opinión pública. Isto é o que encerra a proposta propagandística do Pacto pola Lingua que, xa inicialmente, exclúe a diferentes entidades e organizacións, entre as cales está Vía Galega, pretendendo, así, conformar un marco que lle lexitime as súas actuacións.
Fai falta moito descaro para que despois de 20 anos de aprobar por unanimidade o Plano Xeral da Normalización Lingüística no Parlamento Galego (PXNLG) e que o PP non só se negou a aplicar, senón que lexislou en contra del, veña agora vender consensos, cando, nin sequera, está disposto a asumir dito Plano nin o derrogar o decreto da vergoña.
Estamos ante un goberno farsante, pois a realidade é que mentres anuncia este pacto continúa lexislando contra o galego e a súa utilización ( voto en contra do uso do galego no Parlamento Europeo, supresión do coñecemento da nosa lingua para o acceso á CRTVG, ausencia do galego no proxecto de Lei para o desenvolvemento e impulso da intelixencia artificial na Galiza, despensa de coñecemento do galego para traballar nos campamentos de verán da Xunta, etc)
Basta xa de política galegofóbica. É imprescindíbel derrogar o Decreto 79/2010 para o Plurilingüismo no ensino non universitario que supón que o ensino en galego na Educación Infantil sexa case inexistente e que prohibe ministrar en galego as Matemáticas, Tecnoloxía e Física e Química e, por tanto, implica que hoxe o ensino en galego sexa marxinal nos centros educativos, converténdose no artífice principal de que na escola se perdan galego-falantes.
Non caben subterfuxios, nin discursos retóricos. Necesítase, urxentemente, para avanzar na procura da normalización lingüística, reverter a emerxencia na que está a nosa lingua, garantir o uso do noso idioma en toda situación, lexislar a favor do uso do galego, promover a súa utilización en todos os ámbitos e funcións, vehiculizar o ensino en galego en todas as etapas e niveis educativos, derrogando o decreto da vergoña, e reactivar do PXNLG.Para iso, facemos un chamamento para que as rúas de Compostela, o 23 de febreiro, sexan un clamor para esixirlle a Xunta de Galiza que pare de atacar ao galego e asuma que o noso idioma é o futuro de Galiza.