Ponteareas | Ponteareas xa ole a Corpus. A vila prepárase para volver celebrar a súa festa grande con total normalidade, coas súas alfombras florais ao 100%, moita ilusión e unha ampla programación na que música, actividades e recendo a flores serán as grandes protagonistas.
“Despois de dous anos atípicos recuperamos o ambiente tradicional desta festa con máis de 165 anos de historia. Ilusiónanos que a festividade das semanas previas volva ás nosas rúas, gozar dos portais cheos de veciños e veciñas esfollando as flores e preparando todo o necesario para crear verdadeiras obra de arte efémero e da ledicia contaxiosa de traballar toda a noite para plasmar eses debuxos que sempre nos sorprenden e dos aromas que tantos sentimentos espertan en todas e todos nós”, destaca a alcaldesa, Cristina Fernández Davila. A rexedora convida a veciñanza e visitantes a experimentar a festa grande de Ponteareas dende os días previos.
A programación comezará esta mesma fin de semana con varias actividades relevantes. Así, o venres 10 de xuño terá lugar a tradicional presentación da revista Pregón ás 20.30 h na sala multiúsos do auditorio municipal amenizada pola música de Zeus Alfaya e Serghei Maximov. Xa o domingo 12 de xuño, tras a inauguración da exposición ‘Corpus en flor’, a musicóloga ponteareá Esther Sestelo Longueira lerá o pregón do Corpus Christi 2022. Será ás 13.00 h na sala multiúsos do auditorio municipal e contará coa actuación musical do grupo Mallou.
Ese mesmo día comezará a animación musical nas rúas, que o domingo será a cargo do grupo folclórico da Casa Cultural de Areas, o luns 13 do grupo Senfol, o martes 14 de Os Muíños de Oliveira, o mércores 15 de Pedra da Garza, o xoves 16 do grupo folclórico San Salvador de Padróns e o venres 17 da agrupación folclórica Algazara. Todas as actuacións comezarán ás 20 h e percorrerán os distintos portais alfombristas.
A fin de semana grande da nosa Festa de Interese Turístico Internacional arrancará o propio venres 17 co concerto da Banda de Música Reveriano Soutullo ás 21.30 h na Praza Fernández Vega. Será a antesala a dous días cheos de alfombras, traballos e moita ilusión. Na tarde do sábado 18 comezarán os traballos de confección das diferentes pezas de arte floral, que durante a noite estarán acompañados de animación musical en diferentes puntos da vila.
Xa o domingo 19 ás 10.30 h terá lugar a recepción de autoridades na Casa do Concello coa Agrupación Musical Nosa Sra. do Carme, que ás 12.30 horas acompañará a tradicional procesión do Corpus Christi. Pola tarde a música, a ledicia e a cor volverán encher as rúas dende as 19.00 h co tradicional desfile de carrozas e a batalla de flores. A música regresará ás 21.30 h co concerto de Leilía na Praza Bugallal, e a xornada rematará coa verbena a cargo da orquestra Saudade, dende as 23 h na Praza Maior.
O luns 20, festivo local, a festa comezará ás 12.00 co tobogán acuático xigante na rúa Braña, do que se poderá gozar ata as 20.00 horas.
Ás 17.00 horas haberá animación infantil no centro urbano e ás 20.00 horas celebrarase a ofrenda floral diante do Monumento ao alfombrismo en memoria das e dos ponteareáns que tanto se implicaron na celebración da festa grande de Ponteareas.
A entrega de medallas do Corpus no parque da Feira Vella ás 21.00 h, a animación musical no centro urbano e a verbena a cargo da orquestra Tango ás 22.30 h na Praza Maior porán o broche de ouro a unha celebración que converterá un ano máis a Ponteareas en referente mundial da arte floral efémera.
Contratación de 12 persoas
O Concello de Ponteareas iniciará o proceso de selección para contratar a 12 persoas en situación de risco ou perceptoras da Renda de Integración Social de Galicia (RISGA) para o desenvolvemento de traballos de mellora dos espazos de utilidade pública e a implementación de servizos de interese social, o que beneficiará a toda a veciñanza.
Serán en total 9 persoas para o posto de peón de medio ambiente, 2 que traballarán como auxiliares administrativas e unha para desenvolver tarefas de limpeza que se incorporarán aos seus postos a partir do vindeiro mes de xullo.
“Xerar emprego é un piar básico para conseguir o benestar das familias ponteareás. Nese camiño para nós é fundamental poder volver incorporar ao mercado laboral a persoas desempregadas, moitas delas que levan moito tempo buscando un traballo”, asegura a concelleira de Formación e Emprego, Vanesa Fernández Soage.
Para estas contratacións o Concello conseguiu unha subvención de case 128.000 euros da Xunta de Galicia para fomentar a empregabilidade a través de adquisición de experiencia profesional de persoas desempregadas de moi difícil inserción laboral ou en risco de exclusión social.
Aínda que con esta axuda a Xunta subvenciona a contratación de ata o 75% da xornada laboral, o Concello asumirá por primeira vez con fondos propios o 25% restante para que todos os postos sexan a xornada completa.
Deste xeito, “melloramos e garantimos as condicións de traballo de cada unha das persoas contratadas, facilitando do mellor xeito posible o acceso ao mercado laboral de persoas nunha situación máis desfavorecida e mellorando ao mesmo tempo os servizos municipais e os espazos públicos”.
Poderán participar no proceso de selección persoas perceptoras da RISGA inscritas no Servizo Público de Emprego de Galicia como persoas demandantes non ocupadas. Terán preferencia aquelas persoas que teñan asignado un proxecto de inserción de carácter laboral, as maiores de 45 anos e as que teñan cargas familiares.
