Vigo | A High Tech Auto da Zona Franca de Vigo acolleu o 1º Bootcamp Inclusivo de Tecnoloxía, unha experiencia piloto de formación organizada pola Universidade de Vigo coa colaboración da Fundación Adecco e a participación de KIDCODE, empresa especializada no ensino tecnolóxico responsable para públicos diversos, que pretende achegar a persoas con discapacidade intelectual ferramentas tecnolóxicas de última xeración, favorecendo así a súa autonomía persoal, a súa empregabilidade e a súa participación na sociedade dixital.
A HTA ofreceu unha contorna de innovación e un laboratorio con tecnoloxía punteira, onde participaron mozas con discapacidade intelectual cubrindo todas as prazas dispoñibles. A formación tivo un enfoque práctico, e inclusivo, combinando contidos como programación, robótica, impresión 3D e intelixencia artificial, con metodoloxías activas e acompañamento personalizado. O delegado do Estado na Zona Franca, David Regades, asistiu á formación e puido compartir cos e as participantes o seu interese por estas ferramentas tecnolóxicas.
“O uso das novas tecnoloxías debe ser universal e inclusivo e desde as institucións temos o deber de apoiar e buscar opcións para que chegue a toda a sociedade”. O delegado insistiu en que “a innovación é o camiño para que todas as persoas, á marxe das súas diferentes capacidades, dispoñan dunha formación adecuada para o seu desenvolvemento persoal e un mellor acceso ao mercado laboral”.
No futuro, tal e como xa explicou a Universidade, este bootcamp aspira a converterse nunha microcredencial adaptada e en liña coa crecente demanda de competencias dixitais en todos os sectores profesionais. A iniciativa xorde do compromiso de Zona Franca e UVigo coa innovación social e a inclusión, e parte da necesidade de superar a brecha no acceso á formación tecnolóxica por parte do alumnado con discapacidade intelectual. De feito, desde a institución académica aseguran que tanto o alumnado de EMAU como outras persoas mozas con discapacidade intelectual, está moi interesado no uso da tecnoloxía, pero non reciben oportunidades formativas ao redor dela.