Vigo | O delegado do Estado no Consorcio da Zona Franca de Vigo, David Regades, deu a benvida ao novo Capitán da Compañía Fiscal e de Seguridade Portuaria e Aeroportuaria de Vigo, Miguel Ángel Martín Márquez.
O novo Capitán toma a substitución de José Benito Fernández, que cesou tras oito anos á fronte de Fronteiras ao ascender o verán pasado e pasar á Xefatura de Persoal e Apoio da Comandancia de Ourense.
O novo responsable leva máis de 30 anos no corpo e desenvolveu a maior parte da súa carreira profesional na provincia de Pontevedra, asumindo diferentes cargos en Baiona, Porriño, Tui e agora en Vigo. Del dependen 87 axentes encargados de velar pola seguridade portuaria e aeroportuaria de Vigo.
Durante o seu encontro, David Regades trasladou a Martín Márquez o seu agradecemento polo seu traballo e especialmente no último ano, en plena pandemia, ademais de desexarlle os maiores éxitos no seu actual labor.
